وەزارەتا پێشمەرگەی: ڤەكێشانا هێزێن ئەمریكا د ڤی دەمێ هەستیار دا، جهێ دلگرانیێ یە
وەزارەتا پێشمەرگەی دلگرانییا خوە ژ ڤەكێشانا هێزێن ئەمریكا بێ دابینكرنا سیستمەكێ بەرگریێ دیار كر و راگەهاند: پاراستنا ئەسمانی هەرێما كوردستانێ ئەركێ حوكمەتا فیدرالی یە و پێشمەرگە ژی بەرهەڤە بۆ هەر پێشهاتەكا نوو.
ل ڕۆژا دوشەمبی 28 ئیلۆنا 2026، وەزارەتا پێشمەرگەی ل حوكمەتا هەرێما كوردستانێ د بەیاننامەیەكێ دا دیار كر، ڕۆژا 30 ئیلۆنێ هێزێن ئەمریكا ل سەر ئاخا ئیراقێ و هەرێما كوردستانێ دێ خوە ڤەكێشن. هەروەسا ڕۆهن كر، ئەڤ ڤەكێشانە دەرئەنجامێ تێكگەهشتنا هەڤپشك یا حوكمەتا فیدرالییا ئیراقێ و ئەمریكا و هەڤپەیمانانە.
وەزارەتێ ئاماژە ب وێ كر، ڤەكێشانا هێزێن ئەمریكا و هەڤپەیمانان ژ ئیراقێ د دەمەكێ هەستیار دا یە، ب تایبەتی ڕەوشا ئاسایشێ ل ئیراقێ و ڕۆژهەلاتا ناڤین یا ئارام نینە و پێدڤی ب هشیاری و بڕیاردانا سیاسییا دروست هەیە. باسێ وێ چەندێ ژی كر، بەردەوامبوونا نە ئارامییا ڕەوشا دەڤەرێ هگیفی بۆ سەر هەموو ڕۆژهەلاتا ناڤین.
د بەیاننامەیێ دا هاتییە، د دەمێ شەڕێ د ناڤبەرا ئەمریكا و ئیرانێ ل مەهێن بۆری دا، هەرێما كوردستانێ پتر ژ هزار جاران تووشی هێرشێن درۆنی و مووشەكێن بالیستی بوویە و پشكەك ژ وان ل سەر دەڤەرێن مەدەنی كەفتنە خارێ. ب ئەگەرێ ڤان هێرشان ژی چەندین كەسان ژیانا خوە ژ دەست دا و بریندار بوون، مل ب ملێ زیانێن مەزن یێن مادی.
وەزارەتا پێشمەرگەی دیار كر، بجه هێلانا هەرێما كوردستانێ ژ ئالیێ ئەمریكاڤە د ڕەوشەكا ئالۆزیا دەڤەرێ دا بێ دابینكرنا چ سیستمەكێ بەرگریێ، جهێ دلگرانیێ یە. د هەمان دەم دا پشتڕاستین كو ئەسمانی هەرێما كوردستانێ وەك پشكەك ژ ئەسمانی ئیراقێ، ئەركێ لەپێشینێ یێ حوكمەتا فیدرالی یە و دڤێت بەرپرسیارەتییا پاراستنا ئەسمانی هەرێما كوردستانێ د دەمێ پێدڤی دا ب ستوڤە بگریت.
وەزارەتا پێشمەرگەی دوپات كر، وەك چەوا د دەمێن بۆری دا پارێزەرێن ئاخ و خەلكێ كوردستانێ بوون، د پاشەڕۆژێ دا ژی بۆ هەر ئەگەر و پێشهاتەكا نوو ئامادەنە و دشێن ل گەل هەر ڕەوشەكا نەچاڤەڕێكری خوە بگونجینن و ڕووب ڕووی مەترسییان ببنەڤە. هەڤدەم سوپاسییا زۆرا ئەمریكا و هەڤپەیمانێن وێ كر و ڕێز ل هەڤكاری و پشتەڤانییێن وان گرت كو د دەمێن بۆری دا پێشكێشی هەرێما كوردستانێ و هێزا پێشمەرگەی كرینە.
ل دووماهیێ وەزارەتێ ڕاگەهاند، هێزا پێشمەرگەی وەك پشكەك ژ سیستەمێ بەرگرییا ئیراقێ، پەیوەندییەكا دەستووری و ئەمنییا ب هێز ل گەل لەشكەرێ ئیراقێ هەیە و د كاركرنا هەڤپشك و هەماهەنگیێ دا دێ بەردەوام بن. پشتڕاستی ژی دا خەلكێ كوردستانێ كو وەلاتێ وان د دەستەكێ ئارام و ئاشتیخواز دا یە.
دانوستاندنێن كڤەكێشانا هێزێن ئەمریكا و هەڤپەیمانییا نێڤدەولەتی ل ئیراقێ د دەمێ سالێن بۆری دا ئێك ژ پرسێن ئالۆزێن د ناڤبەرا بەغدایێ و واشنتۆنێ دا بوویە. ل گۆرەی ڕێككەفتنا هەردوو وەلاتان، بڕیارە تاوەكو دووماهییا ڤێ مەهێ، پترییا هێزێن ئەمریكا ئاخا ئیراقێ و هەرێما كوردستانێ بجه بهێلن.
ئەڤ ڤەكێشانە د دەمەكێ دا یە كو دەڤەر د ڕەوشەكا گەلەك نەئارام دا دەرباز دبیت. ل مەها شواتا ئەڤسالە دا شەڕەكێ گران د ناڤبەرا ئەمریكا و ئیرانێ و گرۆپێن چەكدارێن نێزیك ل تەهرانێ سەرهلدایە. د وی دەمی دا ئاخا هەرێما كوردستانێ چەندین جاران بوویە ئارمانجا هێرشێن مووشەكی و درۆنی یێن ئیرانێ و میلیشیایان، هەتا نڤیسینگەها مەسرور بارزانی، سەرۆكێ حوكمەتا هەرێما كوردستانێ ژی د ناڤەڕاستا مەها ئابێ دا كرە ئارمانج.
