پڕۆژەیەك بـۆ زێدەكرنا مووچەیـێ كەسوكـارێن شەهیدان هاتیە بەرهەڤكرن
هەولێر، قائید میرۆ:
بریكارێ وەزارەتا شەهید و ئەنفالكریان ئاشكرا كر، پڕۆژەیەك بۆ زێدەكرنا مووچەیێ كەسوكارێن شەهیدان هاتیە بەرهەڤكرن و دبێژیت: شاندێ وەزارەتا وان سەرەدانا بەغدا كریە و تێكگەهشتن د ناڤبەرا هەردولایان دا هەنە بۆ زێدەكرن و وەكهەڤكرنا مووچەیێ كەسوكارێن شەهیدان.
دكتۆر ناڤسەر نووری عەبدال، بریكارێ وەزارەتا شەهیدان و ئەنفالكریان بۆ رۆژناما ئەڤرۆ دیاركر، شاندێ وەزارەتا شەهیدان و دەزگەهێ شەهیدێن ئیراقێ ل دۆر بابەتێ وەكهەڤكرنا مووچەیێ كەسوكارێن شەهیدان كۆمبووینە و گۆت: «تێكگەهشتن د ناڤبەرا وان دا هەیە، مووچەیێ كەسوكارێن شەهیدێن هەرێما كوردستانێ ژی ل گەل یێن ئیراقێ بهێتە وەكهەڤكرن، چونكی مووچەیێ كەسوكارێن شەهیدان ل بەغدا میلۆنەك و 200 هزار دینارن، مە وەكو وەزارەتا شەهیدان پڕۆژەیەك بەرهەڤكریە و تێدا داخوازكریە مووچەیێ كەسوكارێن شەهیدێن هەرێما كوردستانێ ژی بهێتە زێدەكرن وەكی یێن ئیراقێ، هەروەسا مووچەیێ شەهیدێن وەلاتی ژ 250 هزار دیناران بهێتە زێدەكرن بۆ 600 هزار دیناران».
دكتۆر ناڤسەر نووری عەبدال گۆت ژی: «نوكە تێكگەهشتن د ناڤبەرا هەرێم و بەغدایێ دا ل دۆر مووچەیێ شەهید و زیندانیێن سیاسی هەیە، بەلێ مە دڤێت د ناڤا پڕۆژەقانوونا بودجەی دا بهێتە مسۆگەركرن و وەلاتیێن مەژی ژ زێدەكرنا مووچەی مفاداربن، بێگومان هەر زێدەبوونەكا سەربگریت د بەرژەوەندیا خەلكێ هەرێما كوردستانێ دایە، سیاسەتا وەزارەتێ و حوكمەتا هەرێما كوردستانێ ئەڤەیە ب باشترین شێوە خزمەتا كەسوكارێن شەهیدان بهێتە كرن، ب تایبەتی ژ لایێ مادی ڤە ژیانا وان بەرچاڤ بهێتە وەرگرتن».
