نێزیكی هزار رۆژنامەڤانان دێ پارچەیێن ئـەردی وەرگـرن
دهۆك، دلۆڤان ئاكرەیی:
نەقیبێ سەندیكا رۆژنامەڤانێن كوردستانێ دیار كر، نێزیكی هزار رۆژنامەڤانێن هەرێما كوردستانێ فۆرمێن وەرگرتنا پارچەیێن ئەردی پڕكربوون و داخوازییا وان بۆ جڤاتا وەزیران هاتبوو هنارتن و د نوكە دا بۆ وەزارەتا باژێرڤانیێ هاتیە هنارتن.
حاكم ئازاد حەمەئەمین، نەقیبێ سەندیكا رۆژنامەنڤیسێن كوردستانێ بۆ رۆژنامەیا ئەڤرۆ گۆت: «وەزارەتا باژێرڤانیێ لایەنێ ب جهئینانێ یە و سەرۆكوەزیران نڤیسار بۆ وەزارەتێ هنارتیە، دا كو بەرسڤا وی بدەت ژ بۆ هەبوونا پارچەیێن ئەردی، ژ مەها 12یا سالا بۆری سەندیكا رۆژنامەڤانێن كوردستانێ فۆرمێن وەرگرتنا پارچەیێن ئەردی لسەر لقێن خۆ بەلاڤكربوو، رۆژنامەڤانێن ئەندامێن سەندیكا مە ژی وەكو سەندیكا رۆژنامەڤانێن ئیراقێ و فەرمانبەرێن هەرێما كوردستانێ ژ هەژی وەرگرتنا پارچەیێن ئەردی نە، بۆ وێ چەندێ ژی وەكو سەندیكا مە هەمی بزاڤ كرینە دا كو مافێ وان ب دەست بێخین، ئەوێن ئەندامێن كارا یێن سەندیكایێ بن، مافێ وەرگرتنا پارچەیێن ئەردی هەیە، ب مەرجەكی ئەندامێن سەندیكا رۆژنامەڤانێن كوردستانێ بن و ئەركێن سەندیكایێ ب جهئینابن، د نوكە دا نێزیكی چار هزار ئەندامێن كارا یێن سەندیكایێ هەنە، كو پێگیریێن خۆ ب جه دئینن».
