ئیمان نعمان: ده‌مێ ئه‌ز تۆڕه دبم كه‌ڤالان چێدكه‌م
دهۆك، شاكر ئه‌تروشی:
ئیمان نعمان، كچه‌كا خه‌لكا دهۆكێ یه، ژ دایكا خوه فێری چێكرنا وێنان بوویه، پاشی خوشكا وێ یا بچووك ژی ژوێ فیربوویه و برایه‌كێ وێ ژی كاریكاتۆرنان چێدكه‌ت.
ئیمانێ بۆ ئه‌ڤرۆ گۆت: هه‌لبه‌ت دایكا من بوومه رێنیشانده‌ر بوو، چنكو هێشتا ئه‌ز یا بچووك من به‌رێ خوه ددا وان وێنێن وێ چێدكرن و ئه‌ز گه‌له‌ك پێ داخباربووم، له‌ورا ده‌مێ چوویمه قوتابخانێ من ده‌ست دا كاغه‌ز و ره‌نگان و وێنه چێدكرن، ل وی ده‌می ماموستا و هه‌ڤالێن من یێن قوتابی ژی گه‌له‌ك كه‌یفا وان دهات و ئه‌ز هانددام كو یا به‌رده‌وام بم، پشتی ئه‌ز مه‌زن بوویم من دخواست بچمه په‌یمانگه‌ها هونه‌رێن جوان دا هونه‌رێ شێوه‌كاری ب شێوه‌كێ ئه‌كادیمی بخووینم، لێ ده‌لیڤه نه‌بوو، له‌ورا ئه‌زچووم من زانكۆ ب دووماهی ئینا، بۆ زانین ل قوناغا زانكۆیێ ژی من به‌رده‌وم وێنه‌چێدكرن، نوكه هژماره‌كا كه‌ڤالان ل به‌ر ده‌ستن و هه‌ر ده‌مێ من دیت كه‌ڤالێن من تێرا پێشانگه‌هه‌كێ دكه‌ن ل وی ده‌می دێ پێشانگه‌ها خوه یا ئێكێ ڤه‌كه‌م و ناڤه‌رۆكا پتریا كه‌ڤالێن من ل دۆر كه‌تۆاری و كاودانێن كوردانه و ئه‌ز زێده‌تر ره‌نگێن ئاڤی بكار دئینم، بۆ زانین ده‌مێ ئه‌ز تۆڕه دبم ب چێكرنا كه‌ڤالان تۆڕه‌ییا خوه دشكێنم هنده‌ك كه‌ڤالان ب رۆژه‌كێ و هنده‌كان ژی ب هه‌یڤه‌كێ یان پتر ئه‌ز ب دووماهی دئینم، ئه‌و ل دووف بابه‌تێ كه‌ڤالی دمینت و هنده‌ك كه‌ڤالێن خوه من بۆ فرۆتنێ نیشاداینه و ئه‌ز ب كه‌ڤالێن شێوه‌كار زیره‌ك زێره‌ڤان عه‌لی داخبارم.
ل دووماهیێ گۆت: پركرنا ڤالاهیه‌كێ، گه‌هاندنا په‌یامه‌كێ، كرنا كاره‌كێ جیاواز، ئه‌ڤه هه‌موو ئه‌و كارن یێن ئه‌م ل دونیا خوه دكه‌ین، دخوازم ژیه‌كێ كێمێ ڤالاهی و پری په‌یام و هه‌موو كارێن هه‌ر چاوا شه‌ڤ بۆ رۆژێ نێزیكه دخوازم سالێن باش بۆ خوه هاتین ژیێ من ژی دا گه‌هشتنا من بۆ عه‌رشێ خه‌ون و هیڤیێن من ژی هند نێزیك ببن، دخوازم هه‌ر رۆژ بژیم وه‌ك كه‌سه‌كا نوو، بێ دوباره‌بوون.
ئیمان نعمان سالح، ژ دایكبوویا سالا 1995 یه، ده‌رچوویا كولیژا زانستێن رامیاری یه ل زانكۆیا دهۆك، بۆ ده‌مه‌كی وه‌ك په‌یامنێر ل رۆژناما ئه‌ڤرۆ كاركریه.
