ئێدی جوتیارێن قەزا شێخان د بەرھەمێ پتاتان دا خوسارەت نابن

ئه‌ڤرۆ نيوز:
تاھر محەمەد تاھر، رێڤەبەرێ چاندنا قەزا شێخان بۆ رۆژناما ئەڤرۆ دیار کر کو سالانە د وەرزێ بەرھەم ئینانا بەرھەمێ پتاتان دا ل سنورێ قەزا شێخان د وی دەمی دا بھایێ پتاتان گەلەک ئەرزان دبیت جۆتیار د بەرھەمێ خوە دا خوسارەت دبن، د ئەڤ سال دا ژ بەر گرنگی دان ب بەرھەمێ وان جۆتیاران ب پشتەڤانیا کەسێن خودان پرۆژێن تایبەت شەش تەزینەرێن ھەلگرتنا بەرھەمێ پتاتان ل قەزا شێخان دھێنە دروست کرن و ھندەک ژ وان کەفتینە د قووناغێن ھەلگرتنا بەرھەمێ جۆتیاران دا.
رێڤەبەرێ چاندنا قەزا شێخان گۆت: “ھەر ئێک ژ وان تەزینەران دێ شێت 10 ھزار تەنێن پتاتان وەرگریت، ھەتا بھایێ وان پتاتان ب گرانی بھێنە فرۆتن جۆتیار دشێن بەرھەمێ خوە رادەستێ وان تەزینەران بکەن ب کرێیەکا ئەرزان کو جۆتیار، بەلێ خوسارەت نەبیت”.
ئەندازیار جەمال زوبێر، بەرپرسێ پشکا باغدار ل چاندنا قەسرۆک بۆ رۆژناما ئەڤرۆ خۆیا ژی کر کو د ئەڤ سالە دا ل ئێک وەرز ل قەزایێن شێخان و ئاکرێ و بەردەرەش نێزیکی 11 ھزار و 600 و 90 تەنان ھاتبوونە چاندن، “نوکە ژی بەرھەڤی بۆ چاندنا وەرزێ دویێ یێ پتاتان دھێنە کرن”.
بەرپرسێ پشکا باغدار زێدەتر گۆت: “د وەرزێ ئێکێ دا، ھەر تەنەکێ پتاتان 11 تەنان بەرھەم ئینان، ئەڤ سالە رێژا بەرھەمی گەلەک باشتر بوو ژ سالێن بۆری”.
ئاشکەرا ژی کر کو گەلەک ژ خودانێن ڤان بەرھەمێن پتاتان، پتاتێن خوە فرۆتینە و ھندەکان د ناڤ کۆگەھێن تەزینەر دا راگرتینە ھەتا بھایێ وان چەندەکێ گران بیت، “سالێن بھێت دێ گەلەک باشتر بیت ھەموو جۆتیار دێ شێن بەرھەمێن خوە ھەلگرن و خوسارەت نابن”.

کۆمێنتا تە