ئێدی دەمێ وێ چەندێ یە کو كێشەیێن هەولێرێ و بەغدایێ ب بنەڕەتی بهێنە چارەسەركرن
سەرۆكێ هەرێما كوردستانێ و شیرەتكارێ ئاسایشا نیشتمانییا بەریتانیایێ كۆمبوون و دوپاتی ل سەر پێشڤەبرنا پەیوەندییێن دووئالی، هەڤكارییا ئەمنی و لەشكەری و بزاڤێن پێكهینانا كابینەیا نوو یا حوكمەتا هەرێما كوردستانێ كر.
نێچیرڤان بارزانی، سەرۆكێ هەرێما كوردستانێ، پێشوازی ل جۆناسان پاول، شیرەتكارێ ئاسایشا نیشتمانییا بەریتانیایێ و شاندەكێ بلندێ دگەل دا كر، هەروەسا عیرفان سدیق، بالیۆزێ بەریتانیایێ ل ئیراقێ و قونسلێ گشتییێ بەریتانیایێ ل هەرێما كوردستانێ د كۆمبوونێ دا بەرهەڤ ببوون.
د دیدارێدا پەیوەندییێن بەریتانیایێ ل گەل ئیراقێ و هەرێما كوردستانێ ب تایبەتی د بوارێ ئەمنی و لەشكەری دا هاتنە گەنگەشەكرن، هەڤدەم دوپاتی ل سەر هەڤكارییا هەڤپشك د ناڤبەرا وان دا هاتە كرن بۆ بەرسینگگرتنا مەترسییێن تیرۆرێ و پاراستنا تەناهیێ و ئارامیێ ل ئیراقێ و دەڤەرێ.
تەوەرەكێ دی یێ كۆمبوونێ تایبەت بوو ب ڕەوشا ناڤخوەیا هەرێما كوردستانێ و لەزكرنا بزاڤان بۆ پێكهینانا كابینەیا نوو یا حوكمەتا هەرێما كوردستانێ، ل گەل پرسا پەیوەندییێن هەولێرێ و بەغدایێ و چارەسەركرنا كێشەیێن هەلاویستی د ناڤبەرا وان دا.
هەروەسا دووماهی پێشهاتێن سیاسی و ئەمنی یێن دەڤەرێ ب گشتی و بزاڤێن دیپلۆماسی بۆ كێمكرنا گرژی و ئالۆزییان هاتنە گەنگەشەكرن.
