ئەتلەتیكۆ و ئارسنال هەڤڕكی بۆ پلێتا زێڕین یا فینالێ یە
جەماوەرێ وەرزشی ل جیهانێ و حەز ژێكەرێن هەردو یانەیێن ئەتلەیكۆ مەدرید یا ئسپانی و ئارسنال یا ئنگلتەرایێ دێ ل دەمژمێر 10ی شەڤ چاڤەڕێ دیتنا ئێك ژ ب هێزترین یاریێن دیرۆكی یێن تیما خوە بن ئەوا دێ ل یاریگەها ئیمارات ل پایتەختێ ئەنگلتەرایێ لەندەن ژ چارچووڤەیێ هەڤڕكیێن گەڕا دویێ یا قووناغا پێش دووماهیێ یا ئێكلاكەر بۆ فینالا قارەمانییا یانەیێن ئۆرۆپا قارەمانێن خولا چامپیۆنز لیگا.
خەونا فینالێ بۆ هەردوكا بەردەستە
د یارییا بۆری دا ئەوا ژ ڤێ قووناغێ هاتیە كرن هەردو یانە ب گۆلەكێ وەكهەڤبوون و دەربازبوون دناڤبەرا وان دا دێ ئەڤ شەڤە ئێكلابیت، یارییا ئەڤ شەڤە بۆ هەردو تیما خەونا فینالێ و دەستڤە ئینانا چامپیۆنزێ یە، هەرچەندە هەردو یانەیان هیچ ناسناڤەك ب دەستڤە نە ئینایە، لێ یانەیا ئارسنال ل وەرزێ 2006ێ گەهشتبوو یارییا دووماهیێ و بەرانبەر بەرشەلۆنا تووشی خوسارەتیێ بوو، ژلایێ خوەڤە ئەتلەیكو مەدرید سێ جاران گەهشتییە فینالێ لێ بەرانبەر هەر ئێك ژ بایرن میۆنخ ل 1974 و بەرانبەر ریال مەدرید ل 2016و 2014 تووشی خوسارەتیێ بوویە و دەستڤالا دەركەڤتیە.
ئارسنال چەوا دەربازبوو
تیما یانەیا ئارسنال ئەوا د سیستەمێ كۆمان دا سەرێ لیستێ هاتبوو ب 19 خالان دەربازبوویە قووناغا 16ێ شیا ل سەركیستێ بایرن لیڤەركۆزن بگەهیتە قووناغا هەشتێ دڤێ قووناغێ ژی دا سەرجەمێ هەردو یارییان ل سەر كیستێ سپۆرتینگ لەشبۆنا دەربازبوو قووناغا پێش دووماهیێ.
ئەتلەیكۆ مەدرید چەوا دەربازبوو
پشتی دەربازبوونا یانەیا ئەتلەتیكو مەدرید ژ قووناغا كۆمان بۆ قووناغا 16ێ شیا سەركەڤتنەكێ و خوسارەتییەكێ بەرانبەر توتنهام یا ئنگلتەرایێ بینیت ب جووداهییا دو گۆلان دەربازبیتە چارێك دووماهیێ و شیا بەرانبەر هەڤڕكا خوە بەرشەلۆنا بهەمان ئەنجام لێ ئەڤجارە جووداهییا ئێك گۆل دەربازبوونا خوە بۆ پێش دووماهیێ مسۆگەر بكەت.
دیدارێن ئاگرین و ئەڤشەڤە دیرۆكی یە
ل دووڤ ئامارێن یاریێن فەرمی یێن هەردو یانەیان دهێتە دیاركرن كو شەش یاری دناڤبەرا واندا هاتینە ئەنجامدان، ئارسنال دو سەركەڤتن، ئەتلەیكۆ ئێك سەركەڤتن و سێ وەكهەڤی هاتینە.
هنگاڤتیێن هەردو تیمان
ل دووڤ ڕاپۆرتێن رۆژنامەڤانی دهێتە پێشبینیكرن یانەیا ئارسنال دێ بێبەهر بیت ژ ستێرێن خوە كای هاڤیرتز و یۆریان تیمبر ژبەر هنگاڤتنێ، لێ ستێرێ تیمێ بۆكایۆ ساكا بۆ یاریێ بەرهەڤبیت، ژلایەكێ دووڤە یانەیا ئەتلەیكۆ مەدرید ژی دێ بێبەهر بیت ژ شیانێن ستێرێ خوە جۆلیان ئالڤارێز و بابلۆ باریۆس ژبەر هنگاڤتنێ.
دادڤانێن ئەلمانی دێ یاریێ بڕێڤەبەن
فدراسیۆنا فوتبۆلا ئۆرۆپا بڕیار دا دادڤانێن ئەلمانی یاریێ بڕێڤە ببەن كو پێكهاتینە ژ هەر ئێك، دانیال زیبرت، یان زایدل، رافائێل فۆلتین، تۆبیاس شتێلەر یێ چارێ، باستیان دانكێرت و رۆبێرت شرۆدەر دادڤانێن ڤارێ.
