فلمێ هوشیار خەلاتێ باشترین فلمێ دۆكیۆمێنتاری ل لوبنانێ وەرگرت
زنار تۆڤی
فلمێ دۆكیومێنتاری (هوشیار) ژ دەرهێنانا زولفەقار موتەیرییە، ل گەڕا 13 یا فلمە فێستیڤالا نێڤدەولەتی یا سینەمایی ل لوبنان خەلاتێ باشترین فلمێ دۆكیومێنتاری وەرگرت.
دەرهێنەرێ وی فلمی دیاركر: د ڤێ فیستیڤالێ دا پتر ژ 60 فلمان ژ 15 وەلاتان پشكدار ب بوون و خۆشبەختانە ئەم شییاین خەلاتێ باشترین فلمی دكیۆمەنتاری وەربگرین، ئارمانجا ڤێ فیستیڤالێ پشتەڤانییە ل سینەما سەربەخۆ و دەرخستنا بەهرەیا دەرهێنەرێن گەنج و دروستكرنا دەرفەتێ بۆ پێشكێشكرنا ئەزموونا سینەمایی یا جودا.
هەروەسا گۆت: ئەڤ فلمە چیرۆكا هشیار عەلی ڤەدگێڕیت، كو ئەو زەلامێ ژیانا خۆ كرییە ئەركەكێ مرۆڤایەتی بۆ پاقژكرنا مینان ژ كوردستانێ و ئاخا ب مەترسی گوهۆڕییە بۆ ئاخەكا ئارام و ژیانبەخش، هەروەسا ب رێكا گەمییا ژیانێ دبینین كو قەهرەمانی ب تنێ د خەیالێدا نینە، بەلكو د راستیێ دا هەیە و قەهرەمانێن راستەقینە ئەون یێن بێ دەنگی روو ب روو مرنێ دبن بۆ هندێ ئارامییێ بدەنە هندەك كەسێن دی، ڤی فلمی شیوازێ بەلگەنامەیی و درامی تێكهەل كرییە بۆ هندێ وێنەكێ كاریگەر پێشكێش بكەت ژ مرۆڤەكی كو شییایە ژ ئازار و ژ دەستدانێ دەرباز ببیت و ب دەستێ خۆ ئاشتیێ دروست بكەت، ل دووماهییا وێ گەمیێ دا هشیار عەلی وەكو قارەمانەكێ سۆپەر دەردكەڤیت ژ جۆرەكێ جودا نەكو ب هێزا جادوویی، بەلكو ب ئازایەتی بشێت ژیانێ ڤەگەرینیتەڤە بۆ ئەردەكی كو رۆژەكێ یێ مری بوو.