ئەردۆغان ژ بۆ کۆمبوونا ل گەل ئەسەدی داخوازا هاریکاریێ ژ پۆتینی دکەت
سەرۆک کۆمارێ تورکیا ژ بۆ هەڤدیتنا ل گەل بەشاری داخوازا هاریکاریێ ژ سەرۆکێ رۆسیا کریە، هەرچەندە ژ بەر فشارێن رۆسیا هەلوەستێ بەشاری هندەکێ نەرم بوویە، لێ ژ بەر خوەنیشادانێن دو رۆژێن بۆری یێن ل دژی تورکیا، بەشار ئەسەد بەرهەڤ نینە بێی مەرج ل گەل ئەردۆغانی کۆمبیت.
رۆسیا دڤێت به‌ری کۆمبوونا پوتین و ئه‌ردۆغانی یا ل باژارێ ئاستانا پایتەختێ قازاخستانێ، به‌شار ئه‌سەدێ سه‌رۆکێ سووریێ بۆ هه‌ڤدیتنا ل گەل سەرۆک کۆمارێ تورکیا رازی بکەت، د ڤێ مژارێ دا په‌یڤدارێ وه‌زاره‌تا ده‌رڤه یا رۆسیا ژی راگه‌هاند کو ئه‌و وه‌سا پێشبینی دکه‌ن د چارچۆڤەیێ کۆمبوونا ئاستانایێ دا سه‌رۆکێ رۆسیا و سه‌رۆک کۆمارێ تورکیا سەبارەت ب رەوشا سووریێ و ب تایبەتی ژی بابەتێ هەڤدیتنا بەشار ئەسەد و ئەردۆغانی بئاخڤن و گۆت: (بۆ مه تورکیا گه‌له‌ک گرنگه و رۆلێ تورکیا د بابەتێ سووریێ دا دیاره و بۆ ڤێ چه‌ندێ ئه‌م حه‌ز دکەین په‌یوه‌ندیێن تورکیا و سووریێ باشتر ببن و وەکو رۆسیا مە دڤێت تورکیا و سووریێ دەست ب قۆناغەکا نوو بکەن، گرنگە بەشار ئەسەد و ئەردۆغان د دەمەکێ نێزیک دا بشێن دەست ب دانوستاندنان بکەن).
چاڤدێرێن سیاسی ژی دیار دکەن، نها رۆسیا دەست ب بزاڤەکا نوو کریە و پۆتینی داخواز ژ سەرۆکێ سووریێ کریە هەلوەستێ خوە ل هەمبەر تورکیا نەرم بکەت، هەرچەندە بەشار ئەسەد ژ بەر فشارێن پۆتینی تا رادەیەکێ هەلوەستێ خوە نەرم کریە، لێ روودانێن دو رۆژان بەری نها ل باکورێ سووریێ و ب تایبەتی ژی خوەنیشادانێن ل دژی تورکیا وەسا کریە جارەکا دی بەشار ئەسەد یێ رازی نەبیت بێی مەرج ل گەل سەرۆکێ تورکیا کۆمبیت.
ل گۆر باوەریا چاڤدێرێن سیاسی خوەنیشادانێن ل دژی تورکیا ل گەلەک دەڤەران ل باکورێ سووریێ ب تەمامی د بەرژەوەندیا بەشاری دانە، ئەو یەک نیشا ددەت خەلک ئێدی ژ تورکیا و گرۆپێن چەکدارێن سەر ب وێ توورە نە و ئەو یەک دشێت ببیتە ئەگەرێ دەستپێکرنا قۆناغەکا نوو، چونکی ئێدی خەلک تورکیا وەکو دەولەتەکا داگیرکەر دبینن و داخوازن تورکیا ژ ئاخا سووریێ دەرکەڤیت، ژ بەر ڤێ یەکێ ژی دبیت بەشار ئەسەد جارەکا دی ژ بۆ هەڤدیتنا ل گەل ئەردۆغانی داخواز بکەت تورکیا مەرجێن سووریێ قەبوول بکەت.
بەری نها ژی بەرپرسەکێ وەزارەتا دەرڤە یا سووریێ دیار کربوو، دڤێت تورکیا هەموو هێزێن خوە ژ ئاخا سووریێ ڤەکێشیت و دەستان ژ پشتەڤانیا گرۆپێن چەکدار و تیرۆرست ژی بەردەت، هەتا تورکیا داخوازیێن سووریێ قەبوول نەکەت شام ژی بەرهەڤ نینە ل گەل تورکیا دەست ب دانوستاندنان بکەت.
ل ئالیێ دی دوهی وەزارەتا دەرڤە یا تورکیا ژی راگەهاند وان دڤێت هەموو پرسێن هەی ل گەل شامێ چارەسەر بکەن، لێ هەتا ل سەر سنۆرێ وان ل گەل سووریێ مەترسی ل سەر ئاسایشا تورکیا هەبن دێ هێزێن وان ل سووریێ مینن، لێ دەمێ رەوشا سووریێ یا ئاسایی بیت وی دەمی تورکیا ژی دێ هەموو هێزێن خوە ژ ئاخا سووریێ ڤەکێشیت.
