ئەرێ بەرشەلۆنا دێ شێت ب ڕێیا ڕیال مەدریدێ ناسناڤی ئێكلاكەت؟
ب ملایینان ژ حەز ژێكەرێن یارییا فوتبۆلێ ل سەر ئاستێ جیهانێ دێ چاڤەڕێ ئێك ژ دیدارێن مەزن بن ئەو بڕیارە ئەڤرۆ یاریگەها كامب نوو یانەیا بەرشەلۆنا ل یاریگەها خوە یانەیا ڕیال مەدرید مێڤان كەت، ئەوا دێ ل دەمژمێر 10ی شەڤ ژ چارچووڤەیێ هەڤڕكیێن گەڕا 35ێ ژ خولا ئسپانیا لالیگا بهێتە كرن، یارییا ئەڤ شەڤە نە بتنێ ب ناڤ كلاسیكۆیە، بەلكو ناڤەڕۆكا شەرەكێ گران و هەڤڕكییەكا دووم درێژە بۆ دەستڤە ئینانا ناسناڤێ لیگایێ یا ئەڤ سالە یە.
سیناریۆیا ئێكلاكەرە
یانەیا بەرشەلۆنا دێ هێتە دناڤ یاریگەهێ دا و خودانا سەرێ لیستێ یە ب كۆمكرنا 88 خالان جووداهییا 11 خالان ژ هەڤڕكێ خوە ڕیال مەدرید ئەوا 77 خالان ڕێزا دویێ دهێت، لەوما ژی سەركەڤتن یان ژی وەكهەڤی د ڤێ یاریێ دا ئانكو ب فەرمی دێ ناسناڤی ئێكلاكەت بەری ب دووماهی هاتنا خولێ ب سێ گەڕان كو دهێتە چاڤەڕێ كرن دبیت پشتی یاریێ یاریزان و پشتەڤانێن بەرشەلۆنا ئاهنگا ناسناڤی ژی ب كەن.
مەدرید یا دنالیت
یانەیا ڕیال مەدرید یا د نەخۆشترین دەمێ خوە دا دەرباز دكەت د ماوەیێ ڤێ وەرزی دا، ڕیال مەدرید نە بتنێ دنالیت ژبەر دووركەڤتنا خالان، بەلكو بەرانبەر بارۆڤەكا دژوارە ژلایەكی هنگاڤتنێن زێدە دناڤا تیمێ دا هەنە ژ وانا، كێلیان مباپی، تیبۆ كۆرتۆا، دانی كارفاخال، ئیدیر میلیتاۆ، هەروەسان نە ئارامییا كەڤتیە دناڤ تیمێ دا پشتی ناكۆكیی دناڤبەرا فالفێردی و چوامینگی پەیدابووی و گەهشتیە پلەیا دانانا دربێ دەستی، ئەڤ ئاریشە وەكرییە ڕاهێنەر ژی كەڤتیە د تاقیكرنەكا بزەحمەت دا بەری دەستپێكرنا یاریێ.
خالێن هێز و لاوازیێ
یانەیا بەرشەلۆنا دێ هێتە دناڤ یاریگەهێ دا ب مۆرالەكا بلند و خوەجهییا ئاست و دەرۆنێ یاریزانان و دێ پشتبەستێ ل سەر پشتەڤانێن خوە كەت و ژهەموو لایەكی ڤە یا بەرهەڤە بۆ سەركەڤتنێ، ژلایێ خوەڤە یانەیا ڕیال مەدرید ب لاواز وكۆمەكا ئاریشەیێن خوە ڤە دێ بزاڤان كەت هەموویی د یارییا ئەڤ شەڤە دا دەربكەت و ڤەگەڕیتە سەركەڤتنێن كلاسیكۆیێ و نەهێلین بەرشەلۆنا ل پێشچاڤێن وێ ئاهنگا ب گێریت.
دیدارێن پێشتر ئاگرین بووینە
ل دووڤ ئامارێن فەرمی یێن دیدارێن گشت یاریێن هەردو یانەیان بڤی شێوەیی بووینە، سەرجەمێ گشتی 263 یاری هاتینە كرن، یانەیا ریال مەدرید شیاییە د106 یارییان دا سەركەڤتنێ بینت، ژلایێ خوەڤە یانەیا بەرشەلۆنا د 105 یارییان دا سەركەڤتن ئیناینە، د 50 یارییان دا وەكهەڤبووینە، ڕێژەیا گۆلێن ڕیالێ 447 بووینە، ژلایێ خوە یێن بەرشەلۆنا گەهشتینە 436 گۆلان، یارییا ئەڤ شەڤە دێ بیتە یا 264، ئەرێ بەرشەلۆنا دێ سەركەڤتنان وەكهەڤ كەت یان ریال دێ ڕێژیا وێ زێدەكەت یان ژی دێ بنه 51 وەكهەڤی؟، هەموو جەماوەر چاڤەڕێ یە.
