ئەز بەردەوام بزاڤان دکەم کو گوهۆڕینێ د کارێ خوە یێ شێوەکاری دا بکەم
زاخۆ، دلۆڤان هالۆ:
هونەرمەندێ شێوەکار و کاریکاتێرست هندرین خۆشناڤ د دیدارەکێ دا بۆ ڕۆژناما ئەڤرۆ دیارکر کو هەر ل ژیێ زاڕۆکینیێ من دەست ب کارێ هونەرێ شێوەکاری و کاریکاتێری دا کرییە، لەوما بەردەوام من وەکو شێوەکار و کاریکاتێرست پشکداری د پێشانگەهێن ڕێڤەبەریا چالاکیێن قوتابخانەیان دا کرینە، ل سالا 1986 من ئێکەم پێشانگەها خوە یا تایبەت یا هونەرێ شێوەکاری و کاریکاتێری ل هەولێرێ ڤەکریە.
ناڤهاتی ئاماژە ب وێ چەندێ ژی کر کو ل سالا 2000ێ من پشکداری د پێشانگەهـ و چالاکیێن نێڤدەولەتی یێن شێوەکاری و کاریکاتێری دا کرینە، هەتا نوکە من بەشداری د زێدەتری 220 چالاکیێن شێوەکاری و کاریکاتێری یێن نێڤدەولەتی دا کرینە ل زۆربەیا وەلاتێن جیهانێ، و چەندین خەلات و باوەرنامەیێن ڕێزگرتنێ من وەرگرتینە.
گۆت ژی:»ل سالا بوری ژ لایێ ڕێکخراوا ئۆستن یا نێڤدەولەتی ڤە ل قوناغا ئێکێ ئەز وەکو ئێك ژ 100 سەرکەفتی ترین هونەرمەندێ شێوەکاری هاتمە هەلبژارتن و ل قوناغا دووێ ژی ئەز وەکو ئێك ژ 50 باشترین و سەرکەفتی ترین کاریکاتێرست ل سەر ئاستێ جیهانێ هاتمە هەلبژارتن و ئەڤە دەستکەفتەکێ گرنگ یێ جیهانیە بۆ من و هونەرێ شێوەکاری و کاریکاتێری ل کوردستانێ».
زێدەتر ژی گۆت:»ب درێژاهیا سالێن کارکرنا من د بوارێ هونەرێ شێوەکاری و کاریکاتێری دا، من بەردەوام پێکول کریه کو گۆهورین و نوویاتی و دەستپێشخەریێ د کارێ خۆ یێ شێوەکاری دا بکەم، و ئەز ستایلێ خۆ پێش بێخم و نەمینمە د ستایلەکێ بتنێ دا، ئەز بەردەوام پێکولان دکەم کو ل سەر ئاستێ کوردستانێ و ئیراقێ و جیهانێ من بەشداری و چالاکی هەبن، بتنێ ل پار سال من بەشداری د زێدەتری 20 پێشانگەهـ و چالاکیێن نێڤدەلەتی دا کرینە».
