ئەلهۆیێن چیای دو ناسناڤ ژ هەژی هەوە نە
ئیحسان حەسەن
قەدەرا ئەلهویێن چیا لڤی وەرزی ئەوبوو كو ببیتە ئێك ژ مەزنترین و ناڤ و دەنگترین یانە لسەرانسەری ئیراقێ، دیسان قەدەرا من ژی ئەبوو كو ئەز دگوتارا خوە یا 200ێ دا لڤێ رۆژنامەیێ، پەسنا ڤان دەستكەڤتان بكەم، پشتی شیای بەری دو رۆژان ناسناڤێ خوە یێ دویێ لڤی وەرزی بدەستڤە بینیت، دەمێ ناسناڤێ كۆپا ئیراقێ یا فوتبۆلێ بۆ جارا ئێكێ ددیرۆكا خوەدا بری، دانایە ل بال ناسناڤێ خوە یێ ئێكێ یێ كۆپا كەنداڤی، ئانكو دهۆك شیا د ماوەیێ سێ مەهان دا وەكو یانەیەكا كوردستانی دو ناسناڤان بدەستڤە بینیت، دیارە ئەلهوییان لڤی وەرزی لسەر ئەنجامێ وی ئاستێ مەزن یێ نیشاندای، دیسان وان سەركەڤتنێن دیرۆكی ئەوێن تۆماركرین دقارەمانیێن نافخۆ و دەرڤە دا، یاریزانێن وان ژی شیان هژمارەكا ناسناڤێن كەسوكی بدەستڤە بینن، لەوما ئەوا چێبووی وهاتیە پێش ژ هەژی هندێ یە پشتەڤان و حەزژێكەرێن یانەیێ شانازیێ ب تیما خوە ببەن، بێ گۆمان ئەڤ دەستكەڤتە ب هەروە و بساناهی نەهاتن، بەلكو ژ ئەنجامێ كارەكێ ب كوم دناڤبەرا كارگێریێ ئەوا كارێ خوە بێدەنگ كرین، لدەستپێكێ پلانا خوە دانی ژبۆ هەڤركییێ لسەر ڤان هەردو ناسناڤان، رۆلێ خوە یێ راستەقینە گێرای ژبۆ پێكئینانا تیمەكا بهێز ژ یاریزانێن خۆمالی ودەرڤە، دگەل پاراستنا هژمارەكا ستێرێن خوە بۆ پتر ژ وەرزەكی، هەروەسا ب پشتەڤانییا سەرۆكێ حكومەتا هەرێما كوردستانێ رێزدار مەسرور بارزانی چ كێمترخەمی نەكری دبەرهەڤكرنا هەر تشتەكێ پێدڤی بۆ سەركەڤتنا كاروانێ تیمێ لڤی وەرزی، ژبلی هندێ دڤێت ئەم رۆلێ دەستەكا راهێنانێ یا پێكهاتی ژ هەر ئێك ژ مەسعوود میرال ئەوی َناسناڤێ كەنداڤی، دیسان كوڕێ پارێزگەهێ سلێمان رەمەزان خودانێ ناسناڤێ كۆپا ئیراقێ ژبیر نەكەین، یێن كو شیاین ب شارەزاهی و خواندنا خوە یا دروست بۆ تیمێن هەڤرك، ناڤەكێ مەزنتر بۆ خوە و تیما خوە چێبكەن، هەروەسا یاریزانێن تیمێ یێن كو هەموو شیانێن خوە ئێخستینە دخزمەت و ناڤودەنگییا تیما خوەدا، دیسان دڤێت رۆلێ حەزژێكەر و پشتەڤانێن تیمێ، فیقییێ یاریگەهان جەماوەرێ یانەیێ یاریزانێن نمرە 12 لبەر چاڤ وەربگرین، ئەوێن چ جاران پشتا خوە نەدایە تیمێ چ دناڤا یاریگەها خوەدا یان دەرڤە، بێ نەڤێت ئامادەبوونا وان یا كاریگەر ب درێسێ زەر و شین كلیلا ڤان دەستكەڤتان بوون، ئانكو هەر ئێك ژوان باش دزانی كارێ وان یێ راستەقینە چییە، تا شیاین دو ناسناڤان بدەستڤە بینن، یا من دڤێت بێژن ئەو تاقیكرنا قارەمانێن ئەلهویێن چیا لڤی وەرزی تێدا ب سەركەڤتین ژهەژی پتر پووتەدانێ یە، ئەگەر مە بڤێت بەردەوامییێ ب رۆلێ خوە وەكو قارەمان بدەن، پێدڤییە پتر پشتەڤانی ل تیمێ بهێتە كرن، چونكو پشتی ڤان دەستكەڤتان كارەكێ مەزنتر ل پێشییا كارگێریێ هەیە، فەرە لدەستپێكێ هەر زوو ئاریشەیا خوە دگەل لژنەیا رێپێدانێ ل فدراسیۆنا فوتبۆلا ئاسیا چاربكەت، ژبۆ مسوگەركرنا پشكدارییا خوە دقارەمانییا كێشوەرێ ئاسیا دا، پاشی كار لسەر تیمەكا بهێزتر بۆ پاراستنا ڤان دەستكەڤتان ل وەرزێ بهێت بكەت، دووبارە پیرۆزە ل یانەیا دهۆك و هەموو كوردستانیان هەردو ناسناڤێن هەوە یێن ژ هەژی هەر سەرفەرازبن.
