ئەلهۆیێن چیا بۆ پێشڤەچوونێ و كوڕێن خابووری بۆ پاراستنا سەرێ لیستێ دێ جەنكن
قەیس وەیس:
بڕیارە ئەڤرۆ چار یاریێن دی ژ هەڤڕكیێن گەڕا 19ێ یا خولا ستێرێن ئیراقێ یا فوتبۆلێ بهێنە ئەنجامدان، هەردو یانەیێن دهۆك و زاخۆ دناڤ ئەرد و جەماوەرێ خوە دا دێ مێڤاندارییا یانەیێن نەفت و ئەلقاسم كەن، سوبەهی یانەیا ل باژێرێ سلێمانیێ دێ بیتە مێڤانا یانەیا نەورۆز د یارییەكا دی یا ب هێز دا.
جەماوەرێ وەرزشی یێ تیما یانەیا دهۆك ئەڤرۆ ل دەمژمێر پێنجی ئێڤاری ب ژڤانن بۆ پشتەڤانییا تیما خوە بەرانبەر مێڤانا وێ یانەیا نەفت یا بەغدایی د یارییەكا گرنگ دا، ئەلهۆیێن چیا ئەوێن ل حەفتییا بۆری ژ كۆپا كەنداڤی ڤەگەڕیایی و شیاین ب سێ گۆلان سەركەفتنێ ل سەر یانەیا ئەهلی سەنعا بینن ژ كۆما ئێكێ دەربازبنە قۆناغا چارگۆشەیا زێرین دێ بۆ یارییا ئەڤرۆ ب مۆالەكا بلند یا ڤێ سەركەفتنێ هێنە دناڤ یاریگەهێ دا و بەردەوامیێ دەنە ئاست و ئەنجامێن خوە یێن باش ب سەركێشیا ڕاهێنەرێ خوە مەسعۆد میرال، تیما دهۆكێ ب كێمترییا ئێك یاری ژ31 خالان رێزا پێنجێ دهێت ب نەهـ سەركەفتن، چار وەكهەڤییان، ژلایێ خوەڤە یانەیا نەفت 27 خال كۆمكرینە ل رێزا نەهێ دهێت، یاری بۆ ئەلهۆیێن چیا ب سانەهی نابیت لێ دناڤ ئەرد و جەماوەرێ خوە یێ مەزن دایە دێ بیتە ڕێكخوەشكەر بشێن ئاستەكێ مەزن نیشان بدەت و بەر ب سەركەفتنا دەهێ بچیت، سەرباری یانەیا نەفت ژی ئێك ژ تیمێن ئاستەنگە و ئاستەكێ باش یێ هەی.
ئەو یاریزانێن گۆلان بۆ دهۆكێ دكەن
تیما دهۆكێ خوانا نەهـ یاریزانێن پشكداری د تۆماركرنا 24 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس پێنج گۆل، كەریم دەرویش سێ گۆل، هەر ئێك ژ و شەرقی ئەلبەحری و مارلۆن دۆسانتۆس دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، سیابەند عەگید و ئیبراهیم غازی گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
زاخۆ چاڤ ل پاراستنا سەرێ لیستێ یە
ژلایێ خوەڤە تیما یانەیا زاخۆ دێ ل دەمژمێر 7:30 شەڤ دناڤ ئەرد و جەماوەرێ خوە مێڤاندارییا یانەیا ئەلقاسم یا نەجەفی كەت، ئێك ژ یاریێن دی یێن ب زەحمەت بۆ كوڕێن خابوری و دێ هەموو بزاڤان كەت هەكەر چنە هەتا دووماهییا ڤێ حەفتیێ ژی بەردەوامبیێ بدەنە سەرێ لیستا خولێ ئەوا نوكە ژ 18 یارییان 35 خال كۆمكرینە ژ 10 سەركەفتن و پێنج وەكهەڤی هەنە، د بەرانبەر دا یانەیا ئەلقاسم 28 خال هەنە رێزا حەفتێ دهێت، یاریزانێن زاخۆ دێ ب پشتەگەرمییا پشتەڤانێن خوە هێنە دناڤ یاریگەهێ دا و ب تنێ بۆ سێ خالان دێ شەڕی كەن پێخەمەت پاراستنا سەرێ لیستێ.
جەنكاوەرێن زاخۆیان گۆلكەرن
پشتی تۆماركرنا گۆلێن گەڕا بۆری هەردو ستێرێن یانەیا زاخۆ یێ بەرازیلی گۆستاڤۆ هێنریك ب 11 گۆلان و یاریزانێ هەلبژارتیێ ئیراقێ ئەمجەد عتوان ب تۆماركرنا 10 گۆلان ل رێزێن ئێكێ و دویێ ل سەر لیستا گۆلكەرێن تیما خوە دهێن، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز و ئەحمەد یاسین هەر ئێك گۆلەك تۆماركرینە كو سەرجەمێ گۆلێن زاخۆ بووینە 30 گۆل د خولێ دا.
سوبەهی هەولێر مێڤانا نەورۆزە
هەر ژ یاریێن دی یێن ئەڤرۆ یانەیا نەفت ئەلبەسرا دێ مێڤاندارییا حدود كەت و نەجەف دێ ل یاریگەها زەورا بیتە مێڤانا كارەبا، سوبەهی ل دەمژمێر دو یێ پشتی نیڤرۆ یانەیا هەولێر دێ ل باژێرێ سلێمانیێ بیتە مێڤانا یانەیا نەورۆز ئێك ژ كلاسیكۆیێن گرن گیێن كوردستانی د خولا ستێرێن ئیراقێ دا، یانەیا پایتەختێ كوردستانی ب28 خالان رێزا هەشتێ دهێت ژ هەشت سەركەفتن و چار وەكهەڤییان لێ تیما نەورۆز خودانا 23 خالانە ل رێزا 12 دهێت ژ شەش سەركەفتن و پێنج وەكهەڤییان.
