ئەمریکا ناهێلیت تورکیا و سووریێ پەیوەندیێن خوە ئاسایی بکەن
ئەڤرۆ
چاڤدێرێن سیاسی دیار دکەن، د رەوشا نها دا ئەمریکا ب چو رەنگەکێ نەڤێت تورکیا و سووریێ دەست ب قۆناغەکا نوو بکەن، ژ بەر هندێ ژی ئەمریکا رێ بۆ بەشاری خۆش کر دا پەیوەندیێن خۆ ل گەل هندەک وەلاتێن عەرەبی ئاسایی بکەت، ژ بەر هندێ ژی هەتا نها بەشار ئەسەد بەرهەڤ نینە ل گەل ئەردۆغانی کۆمبیت.
فەهیم تاشتەکین نڤیسەر و ڤەکۆلەرێ ناڤدار یێ تورکیا راگەهاند، ئەردۆغان ب هەموو رەنگەکێ کار دکەت دا بشێت بەری هەلبژارتنان ل گەل بەشاری کۆمبیت، بێگومان ئەردۆغانی چەند ئارمانجێن سەرەکی هەنە، یا ئێکێ وی دڤێت بابەتێ هەڤدیتنا ل گەل بەشاری وەکو کارتەکێ ل دژی ئۆپۆزسیۆنێ بۆ هەلبژارتنان بکار بینیت و خالا دی یا سەرەکی ژی بێگومان ئەردۆغانی دڤێت رێ بۆ هندێ خۆش بکەت دا پەنابەرێن سووری ڤەگەرنە ڤە وەلاتێ خۆ، چونکی نها بابەتێ پەنابەرێن سووری بۆ تورکیا بوویە ئاریشەکا گەلەک مەزن، ژ بەر هندێ ژی ئەردۆغان ب رێیا رۆسیا دەمەکە کار دکەت دا بشێت ل گەل بەشاری کۆمبیت، لێ ئەمریکا ب هەموو رەنگەکێ ل دژی هندێ یە، ئانکۆ ب کورتی ئەمریکا ل دژی ستراتیژیا ئەردۆغانی یە.
ناڤهاتی ئەو یەک ژی دیار کریە، ئەمریکا شیا ئاستەنگیان ل هەمبەر پلانا تورکیا دروست بکەت، وەلاتێن عەرەبی یێن هەڤپەیمانێ ئەمریکا و ب تایبەتی ژی سعوودیێ ل گەل سووریێ دەست ب قۆناغەکا نوو کرن، نها ژ بۆ بەشاری گەلەک گرنگە، کو وەلاتێ وی جارەکا دی ڤەگەریتە ڤە ناڤ کۆمکارا عەرەبی، ژ بەر هندێ ژی هەتا نها بەشار ئەسەد یێ بەرهەڤ نینە ل گەل ئەردۆغانی کۆمبیت و هندەک مەرج دیار کرینە، ئەردۆغان ژی د رەوشا نها دا نەشێت وان مەرجێن سووریێ بجه بینیت، ئانکۆ ئەمریکا ب رەنگەکێ دی ئاستەنگی دروست کرن و هەتا نها ژی ئەمریکا د سیاسەتا خۆ دا سەرکەفتی بوویە، چونکی د چەند سالێن بۆری دا تورکیا گەلەک ئاریشە بۆ بەرژەوەندیێن ئەمریکا ل دەڤەرێ دروست کرن و نها ژی ئەمریکا هەمان تشتی ل دژی ئەردۆغانی دکەت.
ل ئالیێ دی هژمارەک ژ چاڤدێرێن سیاسی یێن تورکیا و رۆژئاڤایی ژی بەحسێ هندێ دکەن، هەتا رەوشا سووریێ وەکو نها بەردەوام بیت و ئەمریکا ژی ل سووریێ بمینیت گەلەک یا ب زەحـمەتە تورکیا و سووریێ دەست ب قۆناغەکا نوو بکەن، چونکی بەشار ئەسەد ژی نەڤێت ل گەل ئەردۆغانی کۆمبیت، بەشاری دڤێت پشتی هەلبژارتنان ل گەل سەرۆکێ نوو یێ تورکیا کۆمبیت، چونکی بەشار ئەسەد ژی باش دزانیت نها پێگەهێ ئەردۆغانی گەلەک لاواز بوویە و رەنگە گەلەک گوهۆرینێن نوو ژی ل دەڤەرێ روو بدەن، ژ بەر هندێ ژی بەشار ئەسەد هەردەم دبێژیت هەتا هێزێن تورکیا ل سووریێ بمینن ئەو ل گەل وی وەلاتی دەست ب چو دانوستاندنان ناکەت.
ل گۆر باوەریا چاڤدێرێن سیاسی ستراتیژیا ئەمریکا ل دژی تورکیا نها ب تەمامی د بەرژەوەندیا بەشاری دایە، هەرچەندە رۆسیا هەتا نها گەلەک بزاڤ کرینە دا بەشار ئەسەد یێ رازی بیت ل گەل ئەردۆغانی کۆمبیت، لێ هەتا نها ژی بەشار ئەسەد یێ رازی نینە بێی مەرج ل گەل ئەردۆغانی کۆمبیت، هەکە ئەردۆغان هندەک ژ مەرجێن بەشاری قەبوول بکەت ژی بێگومان ئەو یەک دبیتە شکەستنەکا گەلەک مەزن بۆ ئەردۆغانی.
