ئەمریکا کوردێن سووریێ ب تنێ ناهێلیت
بسپۆرەکێ کاروبارێن رۆژهەلاتا ناڤین دیار دکەت دۆنالد ترامپ کار بۆ ئاڤاکرنا کابینەکا بهێز ل ئەمریکا دکەت و رۆژهەلاتا ناڤین ژی بۆ ئەمریکا گەلەک گرنگە و سەبارەت ب سووریێ ژی ئەمریکا دڤێت کورد ل سووریێ بگەهنە مافێن خوە یێن رەوا.
د. حەمید بۆزئارسلان بسپۆرێ کاروبارێن رۆژهەلاتا ناڤین سەبارەت ب کابینا ترامپی و سیاسەتا ئەمریکا ل هەمبەر کوردان ب تایبەتی ژی ل سووریێ بۆ رۆژنامەیا دوڤار یا تورکی راگه‌هاند کو کابینا سه‌رۆکێ نوو یێ ئه‌مریکا وەکو کابینا وی یا بەری نها نینە، ئانکۆ مرۆڤ دشێت بێژیت ترامپێ نها وەکو ترامپێ بەری چار سالان نینە، ئەو یەک ژ شێوەیێ پێکئینانا کابینا وی و کەسێن کو بۆ پۆستێن گرنگ بەربژار کرینە ب ئاشکرا دیار دبیت و گۆت: (ل ئه‌مریکا نه ب تنێ دۆنالد ترامپ، بەلکو پڕانیا سیاسه‌تمه‌دارێن ئه‌مریکا دبێژن پرسا سووریێ نه پرسا ئه‌مریکا یه، لێ د هه‌مان ده‌می دا ناخوازن کو کورد بهێنه ژناڤبرن و ژ بۆ ڤێ چه‌ندێ ژی ئه‌مریکا دڤێت سیستەمێ سووریێ بهێتە گوهۆڕین و کورد ژی وه‌ک مللەت د ناڤ سیسته‌مێ نوو یێ سووریێ دا جه بگرن).
ناڤهاتی هه‌روه‌سا راگه‌هاند ژی کو هه‌که رۆسیا ل سه‌ر ئاڤاکرنا سووریا نوو گه‌ره‌نتیێ بده‌ته ئه‌مریکا نه دووره ئه‌مریکا هێزێن خوه ژ سووریێ ڤه‌کێشیت و سووریێ بۆ رۆسیا بجه بهێلیت و گۆت: (بەری نها ژی بەرپرسێن ئەمریکا بەحسێ ڤێ یەکێ کرینە هەکە د ناڤبەرا وان و رۆسیا دا سەبارەت ب سووریێ رێککەفتنەک بهێتە کرن و رۆسیا بشێت قەیرانا نها ل سووریێ چارەسەر بکەت، وی دەمی ئەمریکا دشێت هەموو هێزێن خوە ژ سووریێ ڤەکێشیت، لێ هەتا نها تشتەک وەسا نینە، چونکی بابەتێ گەف و ئێرشێن تورکیا یێن ل سەر کوردان ل سووریێ گەلەک گرنگە و دڤێت رۆسیا وی بابەتی ب تەمامی چارەسەر بکەت، ئانکۆ دڤێت رۆسیا رێ نەدەت پشتی ئەمریکا چو ئۆپەراسیۆنێن سەربازی ژ ئالیێ تورکیا ڤە بهێنە کرن).
بسپۆرێ کاروبارێن رۆژهەلاتا ناڤین د دووماهیا دیدارا خوە دا ئەو یەک ژی دیار کر، مخابن هەتا نها ژی بەرپرسێن تورکیا ئەڤ راستیە قەبوول نەکرینە کو ئێدی رۆژهەلاتا ناڤین یا جاران نەما و گەلەک گوهۆڕین دروست بووینە و دێ گەلەک گوهۆڕینێن مەزن ژی روو دەن و پرسا کوردی ژی ئێدی بوویە پرسەکا مەزن ل رۆژهەلاتا ناڤین و هەتا ل جیهانێ ژی و گۆت: (تورکیا هەموو هێزا خوە بۆ دژبەریا کوردان تەرخان کریە، ل سووریێ ژی هندەک دەڤەر کۆنترۆل کرینە، لێ ئێدی پرسا کوردی بوویە پرسەکا مەزن د ئاستێ رۆژهەلاتا ناڤین و جیهانێ دا، ژ بەر ڤێ یەکێ ژی دڤێت تورکیا پێداچوونێ د سیاسەتا خوە یا ل هەمبەر کوردان دا بکەت، چونکی نها پشتەڤانیەکا مەزن بۆ مافێن رەوا یێن گەلێ کورد هەیە).
