ئەم ڕۆژا ئەینی ژی نانی دخۆین!!
محه‌مه‌د عه‌بدوللا
ل هەموو ڕۆژێن پێنجشەمبێ ئەم نانی زێدە د ئینین بۆ مال داكۆ تێرا ڕۆژا ئەینی ژی بكەت، چونكی ل تاخێ مە ل ڕۆژێن ئەینی فڕنێن نانێ ڤەناكەن و بێهنڤەدانا وانە، ب ڕاستی ژی ئەم مللەتەكێ حێبەتینە، ئەرێ یا بەر ئاقلە كۆ ل باژێرەكێ وەكی دهۆكێ ل هندەك تاخان فڕنێن نانی، یان ژی خوارنگەه بهێنە گرتن؟ یان ژی هەر خودان كارەك، خودان كومپانییەك، خودان ماركێتەك و بازاڕێن گشتی و خزمەتگۆزاری ب دویڤ دلێ خوە كار بكەن و جهكارێن خوە بگرن و ڤەكەن نەمازە ژی ئەوێن كۆ ب ژیانا خەلكیڤە گرێدای و بێی وان ژیان ب ڕێڤە ناچیت؟ ب دیتنا من دڤێت هندەك یاسا بۆ ب ڕێڤەبرن و ڕێكوپێككرنا تشتێن ناڤبری هەبن، چونكی نەیا دورستە كو تاخەك، یان ژی باژێڕەك د دۆژەكێدا بمینیتە بێ نانێ گەرم ژبەركۆ ئەفەندی یێ وەستیای و ڕۆژا بێهنڤەدانا وی یە، راستە نانپێژ د وەستییێت، لێ پێدڤییە ب كێماسی دو نانپێژ هەبن و ل رۆژێن بێهنڤەدان و ئەینییان كەسەك یەدەك هەبیت و جهێن هەڤدو بگوهۆڕن و وێ ڤالاتییێ پڕ بكەن ، ژبەركۆ دەمێ ل ڕۆژێن ئەینی خوارنگەه و نانپێژی بهێنە گرتن ئێدی دێ رەوشا خوارنێ یا خەلكێ تاخی تێك چیت . ئەز باوەر ناكەم ل جیهانێ هەمیێ خودان كار هەبن كو جهكارێن خوە بگرن نەمازە ژی ئەوێن گرێدایی ب ژیانا خەلكی یا ڕۆژانە ڤە، لەورا هیڤییە دویڤ چوونەك بۆ ڤێ چەندێ هەبیت و هەمی خوارنگەه و نانپێژی بەردەوام د ڤەكریبن، چونكی خەلك ل ڕۆژێن ئەینی ژی نانی دخۆن..
