ئەو زەلامێ گۆڕێ خۆ كۆلای
سالح دۆسكی
زلامەكێ چل سالان گۆڕێ خۆ ب دەستێ خۆ د كۆلا، هەر رۆژ هندەك ئاخ ژ شاشی و پەشێمانییا خۆ ب كۆلانێ زێدەدكر، دەمێ گۆڕێ وی تەمام بووی خۆ درێژكر تێدا و ل بەندا مرنێ ماڤە، بەلێ مرن نەهات..! پیرەمێرەكی رێڤینگ قەستا وی كر و لێنێڕی و گۆتێ: “تو دزانی تو بۆچی نەمری؟ ژبەركو ئەو گۆڕێ تە كۆلایی ب تەمامی هندی قەبارەیێ جەستەیێ تە یێ بەرێ یە نەكو یێ نوكە”.
زەلام ئێكسەر تێكچوو، رابووڤە، ب لەز و بەز ژ گۆڕێ خۆ دەركەفت و ل هنداڤ گۆڕی راوەستیا.. بۆ وی ئاشكرابوو كو ئەو هەمی سالێن ڤەگۆلانێ ئەو ب هێزتر لێ كر، و هەر پەشێمانییەكێ بەرەف باشتر دبر و دكرە كەسەكی جیاوازتر. نوكە ئەو گۆڕێ بۆ خۆ كۆلایی تێرا وی ناكەت.
تەماشەی گۆڕێ ڤالا كر و ژ نیشكەكێ ڤە گڕنژی، ئەڤ چەندین سالێن دوور و درێژن نە گڕنژی.. ژانێ ئەو نە كوژت بەلكو ئاڤاكر و مەزنتر لێكر لەو گۆڕی ترا وی نەكر.. ئەو دووماهییكا هزردكری كو مرنا وی یە دەركەفت بوون و هشیاربوونا وی. ئەو گۆڕ وەكی خۆ هێلا دا ببیت بەلگەنامەیا قورتالبوونا وی.. قورتالبوون ژ مرنا ئاشۆپی یاكو نە راستەقینە، راستە رەڤین و دەستداهێلان مرنەكا ئاشۆپییە بەلێ مرنەكا دۆمدرێژە، راوەستیانە ژ ژیانێ. باش بوو خۆ ژێ قورتال كری. ژ وی دەمی وەرە، رۆژانە سپێدێ ژبەری هەر كارەكی بكەت، دهێت هنداڤ وی گۆڕی و دگڕنژیت و دەست ب رۆژەكا زیندی و بەرهەمدار دكەت.
