ئەو سەمایا ل سەر سنووری
سالح دۆسكی
ل وێ تاریاتییا کو ڕەنگێ خۆ ژ ژبیرکرنێ دزی،
گولان بوو ب شەمالکەکا ژ کێلەکا تیشکێ هاتییە چێکرن
وەختێ گۆل بووینە بارۆت،
و بارۆت بوویە بێهنا مسك و ڕێحانان،
ل وی دەمی… جیهانێ ناسنامەیا خۆ بەرزە کر.
شورش نە تنێ دەنگێ گولەیان بوو،
بەلکو هەژاندنا داربەڕووان بوو د خەونا ئاسمانەکێ دی دا
ل وێ دەرێ…
ئەو دلێ كرین چار پارچە
هەر ب ئێك ئاواز دستری
سەر برینا خۆ دمەشیا
خۆراگر و نە دگری
وەك ئەلهۆیان ب باوەری
دفڕی..
حەزێن ئاگرێ ل سەر بالیفکێن بەفرا هێمن دنویسین،
و لێڤێن زەلال یێن کانییان
سروودا «هەبوونێ» ژ کێلیێن نەمانێ ددۆشین.
گولان…
ئەو دەمژمێر بوو یا کو دەمێ خەوا زڤستانێ ڕاوەستاندی،
و گۆتە مێژوویێ: «ڕاوەستە!»
چونکی چیایێن مە ئێدی نە ب بەرا،
بەلکو ب ئیرادەیا «تەیرێن باز» هاتبوونە ئاڤاکرن.
ل وێ سەمایا سەرسنووری،
گول ل شوینا ئاڤێ، خوینا خۆ وەک شەڕاب ددانە خاکێ،
دا کو سۆتنا لەشێ مە بێ دویکێل بیت،
و بوهارا مە… بویکەک بیت ژ گەردەنا هەتاڤێ هاتییە ڕەڤاندن.
شۆرش…
ئەو پیل بوو یا کو لاپەڕێن سپی یێن مێژوویێ هەژاندین،
و ب پێنوسێ شەهیدەکێ تێهن
ل سەر سینگێ ئەورێن بلند،
هێلانەک بۆ نەوەیێن «رۆناهییا مە» ئافراندی.
