ئەو مووچەیێن بووینە پاشكەفت دڤێت بكەڤنە سەر ژمارێن فەرمانبەران
هەولێر، قائید میرۆ
بسپۆرەكێ ئابۆری دیار كر، بڕیارا دادگەها فیدڕال یا ل دۆر مووچێ فەرمانبەرێن هەرێما كوردستانێ د بەرژەوەندیا هەرێما كوردستانێ دایە، ئەگەر چو ئاستەنگ ژلایێ بەغداڤە نەهێنە چێكرن ل هەمبەری ڤێ بڕیارێ. هەروەسا دبێژیت: حوكمەتا هەرێما كوردستانێ ل گۆرەی قانوونێ نەفت رادەستی بەغداكریە و بەرهەڤی ژی نیشادایە ل گۆرەی قانوونا ئیدارا مالی نیڤا داهاتێ نافخۆ رادەست بكەت، لەوڕا ژی ئەز باوەرم دێ بڕیار د بەرژەوەندیا هەرێمێ بیت ئەگەر وەكی خوە بهێتە بجهئینان.
ئابوورناس د.كاوە عەبدولعەزیز، بۆ رۆژنامەیا ئەڤرۆ ل دور بریارێن دادگەها فیدرالی دو خالێن گرنگ دانە دیاركرن و گۆت: ل دور مووچێن فەرمانبەرێن هەرێمێ، مادەم بریارا دادگەها فیدرال وەسایە دڤێت فەرمانبەرێن هەرێمێ یەكسان بن دگەل یێن ئیراقا فیدرال و مووچێن وان بكەڤنە سەر بەنكێن ئیتیحادی، دڤێت ئەو مووچێن بووینە پاشكەفت ژبەر برینا بەهرا هەرێمێ ژ بودجێ بكەڤنە سەر ژمارێن وان یێن بانكی و ژ بودجێن ئیتیحادی بهێنە مەزاختن.
بسپۆرێ ئابۆری زێدەتر گۆت: ل دور هەلبژارتنێن پەرلەمانێ كوردستانێ، مادەم كوتایێن كێمە نەتەوان ل هەلبژارتنێن هەرێمێ نەمان، دڤێت كۆتایێن د ناڤ پەرلەمانێ ئیراقێ ژی دا نەمینن و هەتا كۆتا ئافرەتان ژی نەمینیت، هەر وەسا بەلانسا پێكهاتان ل كەركوكێ ژی نەمینیت و پیڤەرێ بەلاڤكرنا پۆستان بتنێ هەلبژارتن ودەنگدان بیت.
د. كاوە دوسكی، بسپۆرێ ئابۆری دیاركر «بڕیارا دادگەها فیدڕالی ل دۆر گیرۆبوونا مووچێ فەرمانبەرێن هەرێما كوردستانێ كو نە دەستووری وەسفكری پێنگاڤەكا باشە، بەلێ وەكی هەر جار هندەك بۆمب د ناڤا ڤێ بڕیارێ دا هەنە، ئەو ژی رادەستكرنا داهاتێن نەفتی و نە نەفتی رادەستی حوكمەتا ئیراقێ بكەت، چونكە حوكمەتا هەرێمێ ملكەچی بڕیارا دادگەها ناڤبژیوانیا پاریس بوویە بۆ رادەستكرنا نەفتا هەرێما كوردستانێ.
زێدەتر دبێژیت: ل گۆرەی قانوونا بودجێ گشتیێ ئیراقێ، هەرێمێ نەفت رادەستی كۆمپانیا ب بازاڕكرنا نەفتا ئیراقێ كریە، ل دۆر قانوونێ ژی نیڤا داهاتێن سەروەری رادەستی حوكمەتا ئیراقێ دهێنەكرن و نیڤا دی ژی بۆ هەرێما كوردستانێ نە، حوكمەتا هەرێمێ داخوازكریە وەزارەتا دارایی و دەستەیا دەستپاكیا ئیراقێ سەرەدانا هەرێما كوردستانێ بكەن بۆ رادەستكرنا وان داهاتێن ل گۆرەی قانوونێ رێككەفتن ل سەر هاتیەكر، بەلێ رادەستكرنا هەموو داهاتێن نەفتێ و یێن نە نەفتی ژی دێ ئاستەنگان پەیداكەت ل سەر نەهنارتنا مووچێ فەرمانبەرێن هەرێما كوردستانێ ژلایێ بەغداڤە.
دكتۆر كاوە دۆسكی ئاماژە كر» ئەگەر ئەو بڕیارا دادگەها فیدڕال وەكی خوە بهێتە بجهئینان و حوكمەتا ئیراقێ چو بەهانەیان نەگریت، ئەڤە بێگومان بڕیارا دادگەهێ د بەرژەوەندیا هەرێما كوردستانێ یە بۆ هنارتنا مووچە و شایستەیێن دارایی، ژبەركو دادگەهێ ژی گۆتیە گورەی قانوونا ئیدارا مالی ب رێككەفتن دناڤبەرا هەردوو حوكمەتا داهات بهێنە رادەستكرن و هەمبەردا مووچێ فەرمانبەرێن هەرێما كوردستانێ هەیڤانە د دەمێ خوەدا بهێنە بەلاڤكرن ل سەر فەرمانبەر و خانەنشینێن هەرێما كوردستانێ، ئەز یێ گەشبینم ب بڕیارا دادگەهێ ئەگەر بهێت و ئاریشە و ئاستەنگ ل هەمبەر ڤێ بڕیارا نەهێنە دانان.
