ئەو نامەیا ژ پاخلێن بێزاریێ كەفتی
دلدار محەمەد
دەنگێ هەوارێن ئەڤێ ئێڤارێ دهێنە وە !
ئەزێ ژ ئەڤی عەوری د ترسم! دلێ من ئەوێ ژ ترسێ پر یێ دبێژیت: ئەو بشكۆرینا هەنێ، ماسكە، تەلها د هەمبێزا خۆ دا ب خودان دكەت، ئەز دترسم رۆژەكێ ببینم، هەلاتنێ دەست ژ من بەردان !
كا بێژە من تو ژی ترسێ د گەهێن ڤێ زڤرۆكێ دا نابینی؟ تو ژی بوخچكێن ترسێ ب پشتا سباهی ڤە نابینی؟!
ئەزێ ترسم ماكی دزانیت ما بەلكی ئەو كانیكا مە خەونێن سازگاریێ ب ئاڤا وێ ڤە دیتین، ئالایێ سەرابیێ هەلدەت، كەپرا باپیرێ من ل شوینا چلی ئێدی ترس یا سیبەرێ لێ دكەت، ئەو گوندێ من ب هیڤیان ئاڤاكری، ل شوینا دەمی، ترس یا كەڤالێن هەرفتەییێ لسەر دێمێ وی دنەخشینیت
تو دزانی ئەڤ گۆرستانە یا تژی یە ژ پێیان، تو دزانی پێیەك نینە خەون بۆ بڕینا ڤێ رێكێ نەبن، تو دزانی پێیەك نینە بەرپێكەكێ ترس نەكربیتە لێڤا وی؟! كا لسەر ملێ خۆ بزڤرە سەحكە دوهی، كانێ دێ چەند كەلەخێن گاڤا بینی !
ئەز هەر دبێژم ئەڤ حەنەكە تامیسكێن ترسێ نە ب دێمێ دەمی ڤە، ئەز هەستپێدكەم دەمژمێرێ دڤێت نامەكێ بگەهینتە من، چەند درەنگە! بۆچی من هەتا نهۆ خۆ فێری زمانێ بۆرینا چركەیان نەدكر؟!
ئەز چاوا ئەڤان هەمی سەروچاڤێن پوسیدە تێبگەهینم، سوباهی یا رابوویە وەستیكێن فالنجیبوونێ، هەمی هەمبێز دێ دەستێن ئارامیێن هەناسێن من بەردەن، ئایندە جوتكارەكێ گەوری ئاڤە و دەرامەتێ زەڤیكا وی دەستڤالاتی یە، رۆندك خۆ د چاڤێن بێدەنگییێ ناگرن، ئەز ل لسەر هەمی پێلێن رادیۆیا خۆ یا دێرین گەریام خۆ ئێستگەهەكی تێرا بشكۆرینەكێ دلشادی پەخش نەك.
برس نەشێت سروودا خۆ دەربازی سنوورێ بهیستنا من بكەت، بەلێ ترسێ شادی كرە قردێلكەك ب سەرێ خەیالەكا دوورڤە، من گوهـ ل پستپتسا رێكێ هەبوو دگوت: من جارەكادی ئەڤرازی ئەڤاندی یە بیناهییێ خاتر یا ژ چاڤێن هەدارا من خواستی، ئەرێ كی دێ زانیت گۆڕێ گەشبینیێ لكیڤەیە؟
