ئەڤرۆ ئیراق دێ نەهـ هەلبژارتیێن رۆژئاڤا ئاسیا مێڤان كەت
قەیس وەیس:
بڕیارە ئەڤرۆ قارەمانیا رۆژئاڤا ئاسیا یا تەپا پێی ب پشكداریا نەه هەلبژارتیێن ئۆلمپی یێن یاریزانێن كێمتر 23 سالی ل چەند یاریگەهێن ناڤەراستا ئیراقێ هەتا 19 ڤێ مەهێ بهێتە ئەنجامدان.
ئەو نەه هەلبژارتیێن دێ پشكداریێ كەن بۆ سێ كۆمان هاتینە بەلاڤكرن و ئەوێن دێ ل یاریگەهێن مەدینە ل پایتەختێ ئیراقێ بەغدا و یاریگەها كەربەلا هێنە كرن.
كۆما ئێكێ: ئیراق، ئیمارات، ئۆردن.
كۆما دویێ: ئیران، سۆریا، فلەستین
كۆما سێیێ: عومان، لوبنان، یەمەن.
بریارە ئەڤرۆ سێ یاری بڤی شێوەیی بهێنە ئەنجامدان، دەمژمێر شەشی ئێڤاری عومان- لوبنان، دەمژمێر هەشتی شەڤ سۆریا- فلەستین، دەمژمێر نەهی شەڤ ئیراق- ئۆردن، ل دۆر بەرهەڤیێن هەلبژارتیێ ئۆلمپیێ ئیراقێ رازی شنێشل ئەڤ قارەمانیە ب دەلیڤە دا زانین وەكو وێسگەهەك بۆ ڤاڤارتنێن ئاسیا دەربازبوون بۆ ئۆلمپیادا پاریس 2024ێ و ئەركێ خوە دڤێ قارەمانیێ دا ب زەحمەت دا دیاركرن ژبەر بەرهەڤیێن وان یێن لاواز و نە كۆمكرنا ئەوان یاریزانێن داخوازكری تایبەت یێن هەلبژارتیێ لاوان، لێ پشكداریا هەلبژارتیێ خوە ب گرنگی دا زانین بۆ بهێزكرنا تیما خوە.
