ئەڤرۆ زاخۆ دێ زەورا مێڤان كەت و سوبە نەفتا میسان مێڤانا هەولێرێ یە
ئەڤرۆ
قەیس وەیس:
دهێتە چاڤەڕێ كرن ئەڤرۆ و سوبەهی پێنچ یاریێن مایی ژ هەڤڕكیێن گەڕا 22ێ یا خولا پلا نایابا ئیراقێ یا تەپا پێی بهێنە ئەنجامدان، یاریا زاخۆ دگەل زەورا د بیتە كۆپیتكا یاریێن ڤێ حەفتیێ و هەولێر گەشبینە سەركەفتنا دویێ د ماوێ پێنچ رۆژان دا بینت.
– پشت گەرمیا جەماوەرێ زاخۆ دێ تۆلێن خوە ڤەكە
تیما یانەیا زاخۆ ب ژڤانە ئەڤرۆ دەمژمێر 9:30 شەڤ ل یاریگەها خوە مێڤانداریا یانەیا زەورا یا بەغدایی بكەت بۆ جارا دویێ ل دووڤ ئێك د ماوەیێ كێمتر ژ هەیڤەكێ دا پشتی ل حەفتێ ئادارا بۆری ژ چارچووڤەیێ كۆپا ئیراقێ ل یاریگەها خوە مێڤانكری و تیما زەورا ب گۆلەكێ سەركەفتن ئینابوو و دەربازبوو قۆناغێ16ێ، د یاریا ئەڤرۆ دا كوڕێن خابووری دێ پشت گەرمیا جەماوەرێ خوە بزاڤێن تۆلڤەكرنێ كەن، د خولێ دا زەورا رێزا چارێ دهێت ب40 خالان، زاخۆ 25 خال كومكرینە ل رێزا 13ێ دهێت، كوڕێن خابووری دڤێت سەركەفتنێ بینت ژبۆ خوە دووركرن ژ هێلا مەترسیا داكەفتنێ دا ژبەر كو سێ یانەیێن ل بن رێزبەندیا وێ دا بتنێ جوداهیا وان هەتا سێ خالانە، ژلایێ خوەڤە زەورا دێ شەڕی بۆ سەركەفتنێ كەت پێخەمەت خوە نێزكبوون ل سەر لیستا خولێ ئەوا جەویە ب 44خالان سەرێ لیستێ دهێت، ل دووڤ ئامارێن هەردو یانەیان تیما زەورا 16 جاران سەركەفت ئینایە و زاخۆ دو جاران و شەش وەكهەڤی هاتینە، دووماهی سەركەفتنا زاخۆ ل سەر زەورا بەری دو سال و سێ هەیڤا بوو د خولا نایاب دا ئەوا ب گۆلا هێرشبەرێ خوە زیاد ئەحمەد سەركەفتی و د یاریگەها شەعب یا نێڤدەولەتی دا بوو، ژ یاریێن دی یێن ئەڤرۆ، تەلەبە- كارەبا، نەجەف- كەرخ.
– هەولێر دێ نەفت میسان ب هیڤیین سەركەفتنێ مێڤان كەت
ژلایێ خوەڤە سوبەهی دوشەمبی تیما یانەیا هەولێر ل دەمژمێر 9:30 دێ ل یاریگەها شەهید فرانسۆ حەریری مێڤانداریا یانەیا نەفت میسان كەت د یاریەكا ب سانەهی نابیت بۆ كوڕێن قەلا و منارە ئەوا 25خال كومكرین و رێزا 14ێ دهێت، مێڤانا وێ 32خال كۆمكرینە و رێزا حەفتێ دهێت، ئەڤ یاریە بۆ یانەیا كوردستانی یا گرنگە ژبۆ زێدەتر خوە دووركرن ژ رێزبەندیێن دووماهیێ، ژ یاریێن سوبەهی، كەربەلا دێ جەویە مێڤان كەت.
