ئەڤرۆ ل سنۆرێ ڤێ ناوچەداریێ پـارچەیێن ئـەردی دێ هێنە بەلاڤكـرن
رەمەزان زەكەریا:
د چارچۆڤێ پرۆسێسا بەلاڤكرنا پارچەیێن ئەردی دا ل سەر فەرمانبەران، ئەڤرۆ 30/7/2026 قووناغا ئێكێ یا بەلاڤكرنێ ل ناوچەداریا دارەتوو یا سەر ب دەڤەرداریا بەردەڕەشێ ڤە دێ دەست پێ كەت.
تەحسین عیسمەت، ڕێڤەبەرێ ناوچەداریا دارەتوو بۆ ئەڤرۆ گۆت: «ل دووڤ بڕیارا مەسرور بارزانی، سەرۆكێ حكومەتا هەرێما كوردستانێ، بەرهەڤیێن تەمام هاتینە كرن، كو ئەڤرۆ رۆژا پێنخشەمبی ل هۆلا ڕێڤەبەریا گشتی یا باژێرڤانیێن دهۆكێ، 639 پارچەیێن ئەردی وەكو قووناغا ئێكێ ب شێوازێ پشككێشان ل سەر فەرمانبەرێن ناوچەداریا دارەتوو دا بهێنە بەلاڤكرن».
گۆت ژی: «ئەڤە جارا ئێكێ یە پارچەیێن ئەردی ل ناوچەداریا دارەتوو دهێنە بەلاڤكرن و ل دووڤ خالبەندیێ یە، د قووناغا ئێكێ دا ژ خالا 48 هەتا خالا 21 دێ پارچەیێن ئەردی وەرگرن، دیسا بۆ قووناغا دووێ ئەم ل هیڤیا تەمامبوونا ڕێكارێن كارگێڕی و یاسایینە، كو 550 فەرمانبەرێن دی دێ پارچەیێن ئەردی وەرگرن».
