ئەڤ سالە ل شێخان دو ھزار و 408 دونەمێن ئەردی ب نوکا ھاتینە چاندن
ئەڤرۆ نیوز، نەوزاد ھلۆری:
جودا ژ ھەر دەڤەرەکا دن، سنوورێ قەزا شێخان ناڤ و دەنگیەکا تایبەت ھەیە بو ھەبوونا ھەموو جورێن چاندنێ، و ئەڤ سالە دوو ھزار و 408 دونەمێن عەردی ھاتینە چاندن ب نوکا، و دھێتە پێشبینیکرن کو بەرھەمێ باش بھێتە بەرھەمئینان.
ئەندازیار ئەنوەر عەبدولرەحمان شیرەتکارێ چاندنێ ل شیرەتکاریا قەسروک بۆ ئەڤرۆ نیوز گۆت: (ل سنوورێ قەزا شێخان ب گشتی و ناحیا قەسرۆک ب تایبەتی ھژمارەکا زور یا جوتیاران ھەنە کو زەڤیێن خوە ب چاندنا نوکان تەرخانکرینە و ئەڤ سالە دوو ھزار و 408 دونەمێن عەردی ھاتینە تەرخانکرن ب چاندنا نوکا و دھێتە پێشبینیکرن کو رێژەیەکا باش یا نوکا بەرھەمبینن).
زێدەتر گۆت: (ل سنوورێ قەزا شێخان زێدەتری 100 جوتیاران نوک چاندینە کو ئەڤ یەک ژی ھژمارەک گونجایە ،و ئەڤ سالە بەراورد ل گەل سالا بوری نوک زێدەتر ھاتینە چاندن بەلێ بەرھەم ل گەل ھژمارا زورا عەردی بەرھەم کێمە و ئەگەر ژی دزڤریت بو گورانکاریێن کەش و ھەوایی و کێمبارینا بارانێ د دەمێ خوە دا و ھەبوونا ھەند جورێن نەخوشیان ب تایبەتی لحفە و ئاگروکی و فتریات).
ناڤبری دیارکر ژی کو نھا جوتیارێن نوک چاندین دەستکریە ب دورینا نوکا و ب ھەردوو رێکێن زانستی و کلاسیکی و گوت ژی: (بەھرا پتریا نوکێن دەڤەرێ ھەر ل بازارێن نافخوەیێن دەڤەرێ دھێنە فروتن و بەشەکێ دن ژی رەوانەیێ گومرکا دکەن و پاشان رەوانەیێ بازارێن دەڤەرێن دن دھێنەکرنن و ب شێوەیەکێ گشتی ل سنوورێ قەزا شێخان سێ جورێن نوکا دھێنە چاندن کو ئەو ژی نوکا کوردی، نوکا مەراکش و نوکا رەش).
ب گورەی ئاخفتنێن ناڤبری کیلویا نوکا دناڤبەرا ھزار و 500 بو سێ ھزار دیناران دھێتە فروتن و فروتنا وان ژی ب گورەی جورێ وێ دھێتە گوھرین.
