ئەڤ سالە هەشت ملیۆن گەشتیاران سەرەدانا هەرێما كوردستانێ كریە
هەولێر، قائید میرۆ:
بەرپرسەكێ دەستەیا گەشتوگوزارا هەرێما كوردستانێ ئاشكرا كر، هاتنا گەشتیاران بۆ هەرێما كوردستانێ زێدەبوویە و دبێژیت: ئەڤ سالە هەشت ملیۆن گەشتیاران سەرەدانا هەرێما كوردستانێ كریە، بەرهەڤی بۆ سەرێ سالێ هاتینە كرن و دێ تیمێن گەشتوگوزارێ د ئەركی دابن.
سیروان تۆفیق، رێڤەبەرێ بازاڕكرنێ ل دەستەیا گەشتوگوزارێ بۆ رۆژناما ئەڤرۆ دیاركر، سال بۆ سالێ هاتنا گەشتیاران بۆ هەرێما كوردستانێ زیدە دبیت، ئەڤ سالە هەشت ملیۆن گەشتیار هاتینە هەرێما كوردستانێ، رێژەیەكا زۆر ژێ گەشتیارێن نێڤدەولەتی بووینە و گۆت: «بۆ جارا ئێكێ یە ئەڤ رێژەیا گەشتیاران دهێتە هەرێما كوردستانێ، چونكی 25 هەتا 30%ێ گەشتیارێن ئەڤ سالە ل وەلاتێن بیانی بووینە، لگورەی پلانا دەستەیا گەشتوگوزارێ ژی هەتا سالا 2030ێ دێ هژمارا گەشتیاران د ئێك سال دا گەهیتە 20 ملیۆن گەشتیاران».
سیروان گۆتژی: «بەرهەڤی بۆ سالا نوو هاتینە دەستپێكرن و ل هەموو زالگەهان دێ پێشوازیا گەشتیاران هێتە كرن، هەروەسا تیمێن گەشتوگوزارێ ل رۆژێن بێهنڤەدانا سەرێ سالێ دێ سەرەدانا جهێن گەشتیاری كەن، ب مەرەما دووڤچوونا رەوشا گەشتیاران».
