ئەگەر، نیشان و ڕێکارێن پاراستنێ ژ ئێشانا ملان و ستۆی
ئێشانا ملان و ستۆی یێک ژ ئاریشێن هەرە بەڵاڤێن ساخلەمیێ نە کو ئارامیا ژیانا ڕۆژانە ل دەڤ گەلەک کەسان تێکددەن.
د. عیماد هادی علی، تایبەتمەندێ نەخۆشیێن گەهان، ڕۆماتیزمێ و چارەسەریا سروشتی دیارکر کو ئێشانا ملان پێکدهێت ژ ئەو ئێشانا ژ ڕەخێ ستۆی دەستپێدکەت هەتا دگەهیتە سەرێ ملێ. ڤێ ئاریشێ هەمی تەخێن جڤاکی ڤەگرتییە، بەلێ د ڤان ساڵێن دووماهیێ دا ب شێوەیەکێ بەرچاڤ ل دەڤ تەخا گەنجان زێدە بوویە.
هۆکارێ سەرەکی ژی بۆ ب کارئینانا بەردەوام یا تۆڕێن جڤاکی، درەنگ نڤستنا شەڤێ، و خوارکرنا ستۆی بۆ دەمەکێ درێژ ل سەر مۆبایل و کۆمپیوتەران دزڤڕیت.
ل سەر ئەگەرێن سەرەکی، د. عیماد ئاماژە دا کو چەماندنا ستۆی ب سەعەتان، کارکرنا گران، و بەرکەفتنا سەرما سپلێتێ و موبەریدان ب شەڤێ، ئەگەرێن سەرەکینە. بۆ جوداکرنا جۆرێ ئێشانێ، دکتوری روونکر کو ئێشانا ماسولکان یان تەشنج عەزەلی نێزیکی 3 هەتا 5 ڕۆژان یان زێدەتر هەتا حەفتیەکێ دکێشیت و ب ڕێکا بێنڤەدانا ئاسایی یان ژی ئازارشێنێن سادە چارەسەر دبیت. بەلێ ژلایەکێ دی، ژ ئێشانا فقراتا دەمەکێ درێژتر دکێشیت، ئێشانا وێ دژوارترە، و دبیت ژ چەندین حەفتی و هەیڤان هەتا ساڵەکێ بەردەوام بیت.
د. عماد هادی دیاردکەت، پێدڤییە نەخۆش سەرەدانا نۆشدارێ تایبەتمەند بکەت هەکە ئێشان نەهێلیت شەڤێ بنڤیت، یان هەکە ئێشان و سستبوون ب شێوێ تەزینکێ ژ ملان شۆڕ ببنە خوارێ بۆ دەستان و سەرێ تبڵان. دیسان ئەگەر ئێشان ژ دو حەفتیان پتر بەردەوام بیت و بەر ب زێدەبوونێ بچیت، سەرەدانا نۆشداری یا فەرە. دەربارەی پەیوەندیا ڤێ ئێشانێ ب کێشەیێن دلی ڤە، د. عیماد تەکید کر کو ئێشانا دلی ب دەستگرتنێ و فشارێ ناگوهۆڕیت، بەلێ ئەگەر ئێشانا ملێ چەپێ ب فشارا دەستی زێدە بوو، بەڵگەیە کو ئاریشە ل ماسولکەیێ یە. دیسان پشکنینێن ئێکۆ و هێلا دلی ل دەڤ نۆشدارێ تایبەتمەند ڤێ چەندێ پشتراست دکەن.
د. عیماد دیار کر کو دیارکرنا نەخۆشیێ ب ڕێکا تیشکا ئاسایی یان ئەشعەیا ڕەش و سپی بۆ دیتنا ئینزیلاق و سەوەفانێ دەستپێدکە و گۆت: د قۆناغا دەستپێکێ دا، دەورۆبەرێن 90% هەتا 95% ژ نەخۆشان ب ڕێکا دەرمانان و چارەسەریا سروشتی وەک گەرمیا تیشکا سۆر و ئۆلتراساوند ب تەمامی چێدبن. ب تنێ 3% هەتا 5% ژ نەخۆشان کو فایدەی ژ ڕێکێن ئاسایی وەرناگرن، پێدڤی نشتەگەرییا فقڕاتان دبن.
د. عیماد هادی تەکید ل سەر چەند ڕێنماییان کر و گۆت: سەرێ مروڤی ب خۆ گرانیا وی 5 هەتا 7 کیلوگرامە، بەلێ ب خوارکرنا ستۆی، فشارا سەر فقڕاتان دبیتە 25 هەتا 35 کیلوگرام کو ئەڤە هۆکارێ سەرەکیێ ئینزیلاقێیە، لەوڕا پێدڤییە کۆمپیوتەر بەرامبەر مستەوایێ چاڤان بیت. بۆ ئارامکرنا ئێشانێ ژی بکارئینانا ئاڤا گەرم یان جەوتکێ گەرم بۆ ملان گەلەک باشترە. دەربارەی شێوازێ نڤستنێ، بالیفک پێدڤییە ل دویڤ پەهناتیا ملێن کەسی بیت، نە زۆر یا ستوور بیت ستۆی بلند کەت و نە زۆر یا تەنک بیت ستۆی خوار بکەت. هەروەسا ئەنجامدانا بزاڤێن هێدی یێن ستۆی ب شێوەیەکێ بازنەیی یان بەر ب سینگی ڤە هاریکارەکا مەزنە بۆ پاراستنا ساخلەمیا ملان.
