ئەگەر ئافرەت نەبا نەدشیاین شۆڕەشێ بكەین و هەردو شۆڕەشا ئافرەتا كورد رۆلەكێ مەزن هەبوو
دیدار، سالار محەمەد دۆسكی:
پێشمەرگێ شۆڕەشا 26ی گولانێ، (نوری خەلیل ئەحمەد) یێ ناسیار ب (نوری بابوخكی) ل سالا 1961ێ ل گوندێ بابوخكێ ل دەڤەرا دۆسكییا ژ دایك بوویە، ل گوندێ بابوخكێ (15) شەهید هەنە ژوانا (7) ژ بنەمالێ نورینە و چار ژوان شەهیدان برانە.
پێشمەرگە نوری بابوخكی، د دیدارەكێ دا ل گەل رۆژناما ئەڤرۆ گۆت: بابێ من ل گوندی مرۆڤەكێ دەولەمەند بوو و مرۆڤەكێ نان دەه بوو و ب مال و سامانێ خوە گەلەك هاریكاری و پشتەڤانیا شۆڕەشا ئیلونێ و گولانێ كریە و مالا مە وەك بارەگایەكێ پێشمەرگەی بوو ل هەر دو شۆڕەشان و هەر چار برایێن ژ من مەزنتر بابێ من چەك بۆ كرین بوونە پێشمەرگە.
نوری بابوخكی، زێدەتر گۆت: ل سالا 1977 مالا مە ل گوندی بوو بۆ جارا ئێكێ هاتمە رێكخستن ل گەل (جاسم جاسم)ی و چوومە جزیرێ و هاتمە شەرنەخێ و چوومە ناڤ قوشیریا و مە پەیوەندی ب خودێ ژێ رازی (جوهەر نامق سالم) كر، و هاتمە وەرگرتن بوومە پێشمەرگە وی دەمێ قیادا موئەقت بوو، وی دەمی ژیێ من 16 سال بوو، ل سالا 1979 جارەكێ ب شەڤ ب بەرزەی ڤە هاتمە گوندی، ل سالا 1981ێ پشتی شەرێ ئیراق و ئیرانێ دروست بووی ئێدی هێزا شۆڕەشێ بەرفرەهتر لێ هات ل دەڤەرێ و بارەگا ئینانە دەڤەرێ دووڤ دا هاتینە گوندی و پێشمەرگاتی بەردەوام بوو وی دەمی سەر ب لژنا دهۆكێ ڤە بووم.
پێشمەرگە نوری بابوخكی، زێدەتر گۆت: گەلەك جاران من مرنا خوە دیتی یە و من هزر كریە دووماهی یا ژیانا مە دەمێ ل سالا 1985ێ ل گوندێ ئالەكینا بریندار بوویم كەفتمە ناڤ لەشكرێ ئیراقێ و دەردورێن مە هاتنە دورپێچكرن و برینا من یا گران بوو و هەشت رۆژان من خوارن نەخوار و پێشمەرگەی برمە گوندێ بروحجەرا و گەلەك سوپاسیا بنەمالا (حجی عەلیێ بروحجری) دكەم و هەشت رۆژا مام ل مالا وان و چ جارا قەنجیا وان ژبیر نەكەم و دووڤ و رۆژا دووێ دەرمان گەهشتنە مە ب رێكا (عزیز بابوخكی) و هەشت رۆژا سێلان دامن و وی دەمی هەمی ژ من بهیڤی ب بوون، دووڤ دا بۆ گوندێ گەلناسكێ هاتمە ڤەگوهاستن مالا (عەبدوللایێ حەجی مویسای) ماوێ هەیڤەكێ مامە ل وێرێ و گەلەك ماندیبوون ب من ڤە و چ جاران قەنجیا وان ژبیرناكەم، وی شەری سێ رێكخراوا و بارەگایێ لژنێ ئەوژی رێكخراوا (ئەحمەد حاجی حسێن، شەهیدێن گەڤەركێ، شەهید محەمەد تاهر بێشنكی، دەشتا سێمێلێ) بەرگێریێن دەڤەرێ ژی پشكدار ب بوون، ل رۆژا 19/12/1985 دەمژمێر نەهی شەڤێ شەری دەست پێكر هەتا رۆژئاڤا بووی و هێزا گەلەك یا بەرفرەه بوو و چار فرۆكە ل گەل بوون، دوژمنی (11) جەنازە هێلانە بەر دەستێ مە و (31) بریندار دابوون، نەخوشترین شەر بوو پێشمەرگە (كامیران كورێمەی) شەهید بوو و ئەم چار پێشمەرگە بریندار بووین.
دیسا ل سالا 1979ێ ژی هاتیمە برینداركرن و جارەكا دی ل شەرێ pkk ل ئامێدیێ بریندار بووم ب فرۆكێ ئینامە نەخوشخانێ و جارەكێ چیایێ شێلادزێ بریندار بووم و جارەكێ دی ل هەولێرێ برینداربووم.
نوری بابوخكی، زێدەتر گۆت: دژیێ خوە یێ پێشمەرگاتیێ دا پتر ژ 100 شەر و عەملیات و داستانێن پێشمەرگەی دا پشكدار بوویمە، ژوان عەملیاتێن جەرگێ دوژمنی دا مە ئەنجامداین هێرشكرنا سەر بنگەهێ پولیسان ل بەرۆشكێ و هێرشكرنا چەندین رەبیا ل نزاركێ و مە هاڤێتە زیپوشەكێ دناڤبەرا سێجكێ كێڤلا و نێزیك زركا مەقر سریەكێ و گەلەك جاران مە هاڤێتی یە رەبیا ل هەمی دەڤەران وەك(زڤنكێ و بامەرنێ و مانگێشكێ ) و گەلەك دەڤەرێن دی ژی .
پێشمەرگە نوری بابوخكی ئەو ژی گۆت: ل سالێت هەشتێ شەرێ ئیراق و ئیرانێ بوو خەلكی تەحملا شەری نەبوو و خەلكی هزر دكر كوردن بۆ عەرەبان دێ خوە كوژیت لەوما دگەهشتنە پێشمەرگەی و دیسا خوە پاراست ژی .
نوری بابوخكی گۆتژی: ئەگەر ئافرەت نەبا نەشیاین شۆڕەشێ بكەین و هەر دو شۆڕەشا ئافرەتا كورد رۆلەكێ مەزن هەبوو، چونكە جلكێن پێشمەرگەی دشیشتن و خوارن دایێ و جانێن پێشمەرگەی تژی نان دكر، و هەمان دەم رۆلێ زەلامی ژی دگێرا چونكە ل مال زەلام بوو سەرپەرشتیا زارۆكێن خوە ژی دكر و چ جاران پێشمەرگە برسی نەشیا هێرشێ بكەت ئەگەر ئافرەت نەبا پێشمەرگەی نەشیا چ بكەت، هەر گوندەكێ چووباینێ ژنكا رێز ل مە دگرت و هەر تشتەكێ خوش هەبا ل مال نەدا زارۆكێن خوە بەلكو دا پێشمەرگەی و گەلەك جاران درەنگی شەف چووینە گوندەكی و ژنك دا رابیت خارنێ دروست كەت و جانتێن مە تژی كەت و مە دەتە رێ.
نوری بابوخكی ئەو ژی گۆت: ل سالا 1979 دەمێ هێرشا دوژمنی هاتیە سەر مە ل سنوری و سێ چار جاران هێرشا دوژمنی هاتە سەر مە دو رۆژا مە خوارن و نان نە خوار و هێرشا دوژمنی ب فرۆكا هاتەمە، و ئەو دەمەكێ نێزیك بوو ل سنوری هاتینە دەڤەرێ و بتنێ (10) مەتران هاتبووینە دسنوری دا وی سێ هێرش ئینان و هەر سێ هێرشێن دوژمنی هاتنە شكاندن، وی دەمی سەدام هاتە سەر دەستهەلاتێ و بەغدا ئالوزی كەفتنێ و لەشكر هاتە ڤەكێشان.
نوری بابوخكی زێدەتر گۆت: وی دەمی ئێزگێ دەنگێ كوردستانێ رۆلەكێ مەزن هەبوو دپشتەڤانیا پێشمەرگەی و خەلكی دا و هەر عەملیاتەكا مە كربا دا ئێزگە بەحس كەت، و هەكە مللەتی هاریكاری كربا دا بەحسێ مللەتی كەت و بەردەوام هەمی خەلكی و پێشمەرگەی گوهداریا ئێزگەی دكر و حوكمەتا بەعس تشویش دكەرە سەر .
نوری بابوخكی ئەو ژی گۆت: سێ برایێن من ل ئەنفالان حوكمەتێ بن ئاخكرن، برایەكێ منێ دی ل سالا 1986ێ هاتە شەهیدكرن.
پێشمەرگە نوری بابوخكی، گۆت : داخازێ ژ سەركردایەتیا پارتی دیموكراتی كوردستان دكەم و دادپەروەرانە مافێن ڤی خەلكی نەهێنە بەرزەكرن چونكە ڤی مللەتی پتر ژ 70 سالانە خەباتێ دكەت و خەلكەك هەیە هەتا نوكە چ بوو نەهاتیەكرن و داخازێ دكەین ئەڤ خەلكە نەهێتە ژبیركرن و بچاڤێ دادپەروەرانە تەماشە بكەنێ و ب ئێكگرتنێ ئەف قوناغە دهێتە پاراستن و گەهشتینە قوناغەكا باش مە حوكمەت و پەرلەمان و لەشكەر هەنە و ئەگەر ئێكگرتی بین دەولەتا كوردی ب ئانەهیا خودێ نێزیكە.
