بابه‌كر زێباری: ئیران و توركیا ب دلمرادی سنوورێن خوه كۆنترۆل ناكه‌ن
هه‌ولێر، قائید میرۆ
ڕۆژ بۆ ڕۆژێ ڕه‌وشا ده‌ڤه‌رێن سنووری به‌ر ب پتر مه‌ترسیێ دچن و شیره‌تكارێ له‌شكری یێ سه‌رۆكێ هه‌رێما كوردستانێ ژی ڕادگه‌هینیت، توركیا و ئیرانێ سنوورێن خوه ل گه‌ل هه‌موو وه‌لاتێن جیهانێ كۆنتڕۆللكرینه و ب ئه‌نقه‌ست ناخوازن سنوورێن خوه ل گه‌ل هه‌رێما كوردستانێ كۆنتڕۆل بكه‌ن، هه‌روه‌سا دبێژیت، بڕیاره هێزێن زێره‌ڤانێن سنوری بهێنه زێده‌كرن.
بابه‌كر زێباری، شیره‌تكارێ له‌شكری یێ سه‌رۆكێ هه‌رێما كوردستانێ بۆ ڕۆژنامه‌یا (ئه‌ڤرۆ) گوت” ئه‌و ئاریشه‌یێن وه‌لاتێن ده‌وروبه‌ر بۆ هه‌رێما كوردستان دروست دكه‌ن تنێ به‌هانه‌نه به‌رامبه‌ر هه‌رێما كوردستانێ، چونكه هه‌كه ئاریشه ل سه‌ر سنووری هه‌نه و ئاریشه بۆ وان وه‌لاتان ژلئالیێ سنووری ڤه دهێنه په‌یداكرن ئه‌ڤه ئه‌ركێ وانایه سنوورێن خوه كۆنتڕۆل بكه‌ن و رێ نه‌ده‌ن ب ڕێیا ڤان سنوران ئالۆزی بۆ وان وه‌لاتێن ده‌وروبه‌ر بهێنه په‌یداكرن”.
بابه‌كری زێباری پتر گوت” وه‌لاته‌كێ وه‌كو ئیرانێ سنوورێن به‌رفرهه ل گه‌ل چه‌ندین وه‌لاتان یێن هه‌ین و هه‌موو هاتیه كۆنتڕۆلكرن، به‌رۆڤاژی سنوورێ ئیرانێ ل گه‌ل هه‌رێما كوردستانێ نه‌هاتیه كۆنتڕۆلكرن، ئیرانێ ل خواكۆڕكی ب درێژاهیا سنوورێ خوه ل گه‌ل ئه‌رمینیا و ئه‌فغانستان و پاكستانێ گه‌له‌ك توندكریه و ڕێ ناده‌ت هیچ تشته‌ك بچیته دناڤا سنوورێ ئیرانێ دا، پێدڤیه ئیران سنوورێ خوه ل گه‌ل ئیراقێ و هه‌رێما كوردستانێ ژی كۆنتڕۆل بكه‌ت، وه‌لاتێ ئیرانێ ژی ب هه‌مان شێوه سنوورێ ل گه‌ل وه‌لاتێن ده‌وروبه‌ر یێ كۆنتڕۆل كری ، باشه بۆچی ئیران و توركیا نه‌شێن سنوورێن خوه ل گه‌ل هه‌رێما كوردستانێ كۆنتڕۆل بكه‌ن، دیاره ب ئه‌نقه‌ست سنووری كۆنتڕۆل ناكه‌ن”.
بابه‌كر زێباری ئاماژه‌كر” توركیا سنوورێن خوه ب درێژاهیا زێده‌تری ٩٠٠ كیلۆمه‌تران ل گه‌ل یونانێ یێ كۆنتڕۆلكری و ل گه‌ل ئیرانێ ژی ٧٠٠ كیلۆمه‌تر كۆنتڕۆل كرینه، به‌لێ بۆچی توركیا نه‌شێت ٣٠٠ كیلۆمه‌ترێن سنووری دگه‌ل هه‌رێما كوردستانێ كۆنتڕۆل بكه‌ت، ئه‌ڤه ب دیتنا من جهێ گومانێ یه، ل هه‌رێما كوردستانێ هێزه‌كا زێره‌ڤانێن سنووری یا هه‌ی و سه‌ر ب حوكمه‌تا فیدڕالن، چونكه ژئالیێ دستووری ڤه پاراستنا سنووری ئه‌ركێ حوكمه‌تا ئیراقێ یه و دڤێت ئیراق وه‌كی ده‌وله‌ت سه‌روه‌ریا خوه بپارێزیت، نوكه سێ لیوایێن زێره‌ڤانێن سنووری یێن هه‌ین كو دوو ل هه‌ولێرێ و دهۆكێ نه و لیوایه‌ك ژی ل سلێمانیێ یه، ئه‌ركێ وان هێزێن زێره‌ڤانیێن سنووری دانانا خالێن سنووریه ل گه‌ل وه‌لاتێن ده‌وروبه‌ر هه‌رچه‌نده ڕۆله‌كێ مه‌زن یێ هه‌ی د دانانا هه‌ژماره‌كا مه‌زن یا خالێن سنووری، به‌لێ هێشتا هه‌ژمارا زێره‌ڤانێن سنووری یا كێمه و سۆز هاتیه‌دان هه‌ژمارا وان زێره‌ڤانێن سنوری بهێته زێده‌كرن، هه‌كه هه‌ژمارا زێره‌ڤانان بهێته زێده‌كرن دێ كاریگه‌ریێن خوه هه‌بن و گاڤه‌كا باشه هه‌تا ڕه‌وشا ده‌ڤه‌رێن سنووری بهێته ته‌ناكرن و خالێن زێده‌تر بهێنه دانان”.
