باتیفا دێ پشكداری قاره‌مانیه‌كا نێڤده‌وله‌تی بیت
ئه‌ڤرۆ،عه‌لی حاجی:
د داخویانیه‌كێ دا راهێنه‌رێ تیما تایكۆاندویا باتیفا بۆ رۆژناما ئه‌ڤرۆ دیاركر بۆ جارا ئێكێ یه وه‌كو تیما باتیفا دێ پشكداری قاره‌مانیه‌كا نێڤده‌وله‌تی بن و هه‌بوونا دو یانا ل سنورێ ئیداره‌یا زاخۆ دێ رێ خوه‌شكه‌ر بیت و ده‌لیڤه بۆ یاریزانا په‌یدابیت.
زێده‌تر هیوا ته‌حسین گۆت: بۆ جارا ئێكێ یه بناڤێ یانا باتیفا ئه‌م دێ پشكداری قاره‌مانیه‌كا نێڤده‌وله‌تی بن بۆ یاریا تایكواندویێ ئه‌وا برَیاره ئه‌ڤرۆ ب شێوه‌یێ ئونلاین ده‌ستپێبكه‌ت و ئه‌ڤ قاره‌مانی دێ ل سه‌ر ئاستێ پێگه‌هشتیان بیت كو دێ ب ده‌ه یاریزانا پشكداربین و نێزیكی 20 وه‌لات دێ پشكداری وێ قاره‌مانیێ بن ئه‌وا دێ ب سه‌رپه‌رشتیا دادڤانێن جیهانی دا هێته برێڤه‌برن پێنه‌ڤێت بۆ یانا باتیفا ده‌ستكه‌ڤته كو بۆ جاره ئێكێ یه پشكداری د قاره‌مانیه‌كا ب ڤی ره‌نگی بیت و دێ هه‌موو بزاڤا كه‌ین ژی كو بشێن ئه‌نجامه‌كێ باش ب ده‌ست خوه‌ڤه بینن.
ناڤهاتی ئه‌وچه‌نده ژی گۆت: سیسته‌م و شێوازێ قاره‌مانیێ دێ به‌رچاڤكرنا هنده‌ك لڤینێن پێ و ده‌ستی یێن یاریا تایكۆاندویێ بن كو دێ خال ل سه‌ر له‌زاتی و جوانیا دروست یا ڤان لڤینا هێته دانان، یانا باتیفا پشته‌ڤانیا خوه بۆ مه دیاركریه و ئه‌ڤه دبیته پالده‌ره‌كێ باش و هه‌بوونا دو یانا ل سنورێ ئیدارا زاخۆ دێ زێده‌تر ده‌لیڤێ ده‌ته یاریزانان پشكداری قاره‌مانیا بن.
