بارزانى رێككه‌فتنا ڤه‌كرنا نڤیسینگه‌ها (سۆمو)ل هه‌رێمێ نه هاتیه كرن
ئه‌ڤرۆ نیۆز:
سه‌رۆكێ حوكمه‌تا هه‌رێما كوردستانێ نێچیرڤان بارزانى ده‌نگۆباسێن ڤه‌كرنا نڤیسینگه‌ها كۆپانیا سۆمو یا په‌ترۆلا عیراقێ و رێككفه‌تنا ل گه‌ل به‌غدا ره‌تكر.
سه‌رۆكێ حوكمه‌تێ هیڤى خواست رێككفه‌تنكا نێزیك د ناڤبه‌را هه‌ردو ئالیان دا سه‌باره‌ت باده‌كێن هه‌لاویستى بۆ برێڤه‌برنا وه‌لاتى و سامانێن په‌ترۆلێ و ده‌ڤه‌رێن كوردستانى یێن ده‌رڤه‌ى ده‌ستهه‌لاتا كوردستانێ و پێشمه‌رگه‌ى هه‌بیت.
نێچیرڤان بارزانى دداخوه‌یانیه‌كا رۆژنامه‌ڤانى دا و دپه‌راوێزا پشكداریا رێوره‌سمێن چوونا كه‌لها هه‌ولێرێ دناڤ لیستا كه‌لتۆر و شینوارێن جیهانى دا گۆت: چو بڕیار بۆ ڤه‌كرنا نڤیسینگه‌ها كۆمپانیا سۆمو ل هه‌رێما كوردستانێ نه هاتینه دان.
ل دۆر ئاریشه‌ێن دارایى و بتایبه‌ت یێن گرێدایێ ب بودجا هه‌رێمێ ل گه‌ل به‌غدا بارزانى گۆت: مه بگیانێ چاره‌كرنا قه‌یرانان پشكدارى د حوكمه‌تا نوویا عیراقێ دا كریه و هیڤیدارین هه‌مان گیان چاره‌كرنێ ل نیك وان هه‌بیت.
به‌رى چه‌ند رۆژان هنده‌ك ده‌نگۆباس ژ ئالیێ به‌غدا ڤه هاتبوونه به‌لاڤكرن ژبۆ سه‌رپه‌رشتیكرنا هنارتنا په‌ترۆلا هه‌رێمێ، كۆمپانیا سومو دێ نڤیسینگه‌ها خوه‌یا تایبه‌ت ل هه‌رێما كوردستانێ ڤه‌كه‌ت، به‌لێ حوكمه‌تا هه‌رێما كوردستانێ ب مه‌رجه‌كى رازیبوویه كو رێڤه‌به‌رێ وێ نڤیسینگه‌هێ كه‌سه‌كێ كورد بیت.