باره‌گایێ بارزانی: شه‌هید و برینداركرنا وه‌لاتیێن سڤیل ژئالیێ هه‌ر هێزه‌كێ ول بن هه‌ر بیانوویه‌كی، تاوانه
باره‌گایێ بارزانی د په‌یامه‌كێ دا هه‌ڤخه‌میا خوه بۆ قوربانیێن تۆپبارانكرنا هێزێن توركی ل سنوورێ زاخۆ ده‌ربری، د په‌یامێ دا هاتیه:
ب مخابنیه‌كا مه‌زن ڤه، ژ ئه‌گه‌رێ تۆپبارانكرنا هێزێن توركی بۆ سه‌ر ده‌ڤه‌را په‌ره‌خێ یا گه‌شتیاری ل سنوورێ زاخۆ، هه‌ژماره‌كا وه‌لاتیێن بێ تاوان شه‌هید بوون و هه‌ژماره‌كا دی ژی بریندار بوون. سه‌ره‌رای وێ چه‌ندێ زۆر ب توندی ئیدانا وێ تاوانێ دكه‌ین، سه‌ره‌خوه‌شیێ ل خێزان و كه‌سوكارێن شه‌هیدێن وێ روودانا دلته‌زین دكه‌ین و هیڤیا چاكبوونێ بۆ برینداران دخوازین.
رادگه‌هینین ژی شه‌هید و برینداركرنا وه‌لاتیێن سڤیل و بێتاوان ژئالیێ هه‌ر هێز و ئالیه‌كی بیت و ل بن هه‌ر بیانوویه‌كێ بیت، تاوانه و قابلێ قبوولێ نینه، پێدڤیه ژی سنووره‌ك بهێته دانان كو روودانێن ب ڤی شێوه‌ی دووباره نه‌بن و ئێدی وه‌لاتیێن مه نه‌بنه قوربانی ململانێ و شه‌رێ د ناڤبه‌را هێز و ئالیێن دی. ده‌م وێ چه‌ندێ ییچ هاتی كو حوكمه‌تا هه‌رێمێ و حوكمه‌تا فیدرال ب هه‌ماهه‌نگی ل گه‌ل هه‌ڤدو چاره‌سه‌ریه‌كا جدی و بنه‌ره‌تی بۆ وان هۆكاران ببین نكو دبنه ئه‌گه‌رێ روودانا ڤان تاوان و كاره‌ساتان.
