باژێڕێ دهۆكێ دێ قوناغا دووماهیێ یا ناسناڤی مێڤان كەت
قەیس وەیس:
ب شێوەیەكێ فەرمی فدراسیۆنا یارییا پایسكلان ل ئیراقێ ڕاگەهاند قۆناغا چارێ و دووماهیێ یا قارەمانییا ئیراقێ ل سەر ئاستێن جودا دێ ل باژێرێ دهۆكێ هێتە كرن، ئێكسەر پشتی ب دووماهی هاتنا قۆناغا سێیێ ئەوا بڕیارە ل پێنچ شەمبییا بهێت هەولێرا پایتەخت مێڤاندارییا وێ بكەت.
ل دور ڤێ یەكێ فوئاد حەمە سالح سكرتێرێ فدراسیۆنا یارییا پایسكلان ل ئیراقێ گۆت: پشتی گەهشتنا ڕێكەڤتنێ دناڤبەرا یانەیێن پشكدار و دەستەیا گشتی ب فەرمی بڕیار هاتیە دان باژێرێ دهۆكێ مێڤاندارییا قۆناغا چارێ و دووماهیێ ژ قارەمانییا ئیراقێ بۆ ئاست و ژیێن جودا ل سەر ئاستێ كوڕان و كچان بكەت كو ئێكسەر دێ پشتی ب دووماهی هاتنا قۆناغا سێیێ بیت ئەوا بڕیارە ل پێنچ شەمبییا بهێت باژێرێ هەولێرێ بهێتە كرن بۆ ماوەیێ سێ رۆژان هەر ژ 31ێ ڤێ مەهێ هەتا دویێ مەها بهێت بەردەوامبیت، دووڤدا ل سێ مەها بهێت دێ كۆنگرەیێ هۆنەری بۆ قۆناغا چارێ و دووماهیێ دگەل یانەیێن پشكدار ل باژێرێ دهۆكێ هێتە كرن و رۆژا دووشەمبییا بهێت چاری تەباخا بهێت ل سەر ئاستێ، پشكۆژ، تازەپێگەهشتی، كچان و پێشكەڤتیان بهێتە كرن.
ناڤهاتی ئەگەرێن نێزیكبوونا هەردو قۆناغا دیاركر و گۆت: ژڤانێن هەردو قۆناغێن سێیێ و چارێ لێكنێزك كرینە كو دبیتە جارا ئێكێ یە بڤی شێوەیی ئەو ژی ژبەر بەرهەڤی بۆ قارەمانییا عەرەبی ئەوا دێ چریا ئێكێ یا بهێت ل پارێزگەها هەلەبچەیا شەهید هێتە كرن.
ژلایێ هشیار فەریق سەرپەرشتێ تیما یانەیا دهۆكێ گۆت: هاتنا قۆناغا چارێ بۆ پارێزگەها دهۆكێ دێ بیتە باشترین دەلیڤەیە كو یاریزانێن مە مفایی ژێ وەربگربن و هەموو بزاڤان بكەن بگەهنە دەستكەڤتەكێ دیتر و ئەڤ قارەمانییە ژ دەستێ مە نە دەرگەڤیت و تیما مە یا لاوان ناسناڤی ببەن سەرباری ئەركێ مە ب سانەهی نابیت، وەكو مێڤانداریكرن ژی هەر تشتەكێ پێدڤی دێ هێتە بەرهەڤكرن و سۆپاسییا بەرپرسێن خوە یێن حكومی وەكو پارێزگار و ڕێڤەبەرییا وەرزشی و لژنەیا ئۆلمپییا دهۆكێ و یانەیا دهۆك كو بەرهەڤیێن باش دهێنە كرن و پشتەڤانن، ب هیڤییا وێ یەكێ بشێن دەستكەڤتەكێ دی ل سەر ناسناڤێن دیتر یێن یانەیێ زێدەبكەین.
