برینێن دارستانێ یان مرنەكا پاشئێخستی..

عەدنان ئەحمەد مزووری

« كەسێن ژ نشكەكێ ڤە دبنە دوژمن، ژ دەسپێكێ د كینداربوون، لێ وانا ب باشی ئەكتەری و دورویاتی دكر»
(گۆتنەكا بەربەلاڤە)

پشتی سالێن،
تێهنێ و خوینێ و پەلا،
ڤیا -وەك جەنگاوەر- بێهنا خوە بدەتن،
دەسهاڤێتە تڤەنگا،
چاڤ و مل لاوازكرین و چوو..
لبەر دەرێ مووزەخانەیا پیڕەی،
وی نفشەكێ دی یێ بەڕازا دیت!
× × × ×
پێخاس برێكەتن،
وان دەهۆلێن،
دەبەنگیا خوە قوتان،
ئۆ «رەوشت،
فڕێكرنە دۆزەخێ»،

تۆزا گونەها،
ل پشت خوە دهێلا،
و دەنگێ ئەهریمەنا،
بەری وا دهات،
وەرن،
سەرێ خەنجەرێ (دەرمانە)..
× × × ×
كەسكاتی یە و
حەزا ئبلیسی،
یا دزكێ كولیا دا،
نە ئاگر، نە گازی
تنێ ناڤەك،
و «دل گهان گەویا»،
پەردە هات گرتن..
× × × ×
ب لەز هاتن،
و پێشەمانی یا دلەزێ دا،
بزنە و نانێ شڤانی بر،
هووو، ترافیكا مرنێ یە،
تو نا بینی، سۆرە، خوینە..؟!
یا هە پرە،
كەڤالە،
یاسا خوەگۆریكرنێ یا لسەر..
و «نەزانینا یاسایێ، نابیت بەهانە»!
× × × ×
دەستكێ تەیە
و یێ د دەستێ بێ بەختەكی دا،
ئەلهۆیەكە ژئاسنی،
ئەڤ بڤرە و خڕیا،
دارستانا چڕ،
یا برینێن خوە ڤێددەت،
وێڤەتر،
سیبەرێ چویچك ژ دەستدابوون،
ستران هەمی، بەهین
ئو نهێنی رژیان..
× × × ×
مە ئاگر پەیا كر،
چیا ژی،
تۆنێلەك-برینە- مە دناڤ ڕا بر،
دا، رۆناهیێ بێهنكەین،
دویكێلەكا ڕەش -وەك دلێن وان-
بەربوو مە..
× × × ×
دویر،
ژ شكەستنا..
دەریا خۆلیكی،
تێرا، گەمیڤانێ غەمگین نە دكر،
بەراڤ یێ ل هیڤیێ،
ئۆمێدەكا چكلاندی یە ل وێرێ..
× × × ×
ل دویماهیێ:
با، رەوینا شێتانە دخۆت،
و كاروانێ خەونێ،
رویبارە،
تڕازی «ژ دل» دگڕنژی..

کۆمێنتا تە