برینەكـا كـەڤن و خـەتیریەك بـۆ ئـازادیـێ
دلۆڤان ئاكرەیی
ئەنفالا بەهدینان قووناغەكا ژ هەرە مەترسیدار و دلتەزێن یا پڕۆسەیا ژناڤبرنا ب كۆم یا گەلێ كوردستانێ بوو، كو ژ لایێ رژێما بەعس یا بەری نوكە ڤە ل ئیراقێ هاتە ئەنجامدان.
ل دەمەكێ كو قووناغێن پێشتر یێن ئەنفالێ ل ناڤچە و دەڤەرێن دی یێن كوردستانێ هاتبوونە ئەنجامدان، بەلێ دوژمنێن ئازادیێ پێلا خۆ گەهاندە بەهدینان و گەلەك دەڤەرێن پارێزگەها دهۆكێ ژی بوونە ئارمانجێن پیس و هزرێن وان یێن تاری.
پڕۆسا ئەنفالا بەهدینان ئێك ژ تاریكترین و ترسناكترین لاپەڕەیێن دیرۆكا گەلێ كوردستانێ یە، تراژیدیایەكا كو هەموو پەرێن وژدانا مرۆڤایەتیێ هەژاند و بیرەوەریەكا تاڵ و ژبیرنەكریە و ئەڤ كارەساتە نەك تنێ ژناڤبرنا جەستەیی یا مرۆڤان بوو، بەلكو هەولەك بوو ژ بۆ ژناڤبرنا ناسنامە و چاند و هەبوونا نەتەوەیی یا كوردان ب هەموو هێزا چەكی و شیانێن خۆ یێن سەربازی ژلایێ رژێما دكتاتۆرا بەرێ یا ئیراقێ ڤە.
دیمەنێن وی سەردەمێ پڕن ژ ئازار و رەنجێ، كۆچبەریا بەلاڤ یا دەربەدەریێ ب سەر سەد هزار مرۆڤێن سڤیل دا، رێیێن سەخت و زڤستانا ساڕ، نەبوونا خوارن و دەرمانان ل سەر سنووران و ژ هەمیێ دلتەزێنتر، جوداكرنا مێر و گەنجان بۆ جهێن نادیار و ب كۆم گولبارانكرن و زیندە ب چاككرنا وان ل بیابانێن بێ خۆدایێن ئیراقێ.
ئەڤ دیمەنە نە ژ بیركرنینە و نە ژی د دەستهەلاتا هیچ كەسەكی دایە ژ هزر و بیرێن مە برەڤن.
ژ بۆ كو ئەڤ ڕوودانە چ جاران دوبارە نەبن، پێدڤییە پشكداریا وێ وەك وانەیەكا هەردەمی د ناڤ پڕۆگرامێن خواندنێ دا ل هەمی قووناغان بهێتە گۆتن. چاندنا ڤی راستیێ د مەژی و هزرا زارۆكێن مە دا، زامەنكرنا پاراستنا ناسنامەیێ و دروستكرنا ئیرادەكا پولایینە بەر ب سەربەستی و رەهاییەكا ئێكجاری ڤە و ب ڤی رەنگی، ئەقلیەتا زۆرداریێ دێ هێتە نیاسین و ڤەگوهاستنا گۆتنێن دیرۆكی بۆ نفشێ نوو دێ بیتە مەتالەكێ مەزن.
دیرۆكێ هەردەم سەلماندییە كو دەسهەلات و سیستەمێن زۆردار و خوێنڕێژ، چەندە مەزن و ب هێز ژی بن، د دوماهیێ دا دێ گەهنە سزایێ خۆ و دزبلدانا دیرۆكێ دا ب ناڤەكی رەش دێ هێنە ناسین، چونكو وەكی گۆتی: زالم دو جاران دێ هێتە سزادان، ل سەر دونیایێ و ل بن دونیایێ.
سروشت، دارستان و كانیێن دەڤەرا بەهدینان ب تەڤایی هاتنە ژەهركرن و ژناڤبرن ب مەرەما ڤالاكرنا دەڤەرێ.
ئەنفالا بەهدینان برینەكا قوولە د دیرۆكا گەلێ كورد دا و هێشتا شوینوارێن وێ یێن دەروونی و جڤاكی د ناڤ خەلكێ دەڤەرێ دا مایینە، چونكی گەلەك ژ خێزانان هێشتا چارەنڤیسێ مالباتێن خۆ نەزانن و پێدڤییە هەردەم بهێتە بیرا مە، داكو مرۆڤایەتی هەرگیز نەهێلیت تاوانێن وەسا دوبارە ببن.
سەركرداتیا رژێما بەعس ئەنفالكر، بەلكو ب خۆ گەهشتنە سزایێ خۆ و كەفتنە زبلدانا دیرۆكێ، ل دەمێ كو گەلێ كورد ب هەموو سەربۆر و قوربانیێن خۆڤە رۆژ بۆ رۆژێ ب هێزتر ل سەر پێیێن خۆ راوەستییا.
سەروەریا ڕێز و نەمرینێ بۆ گیانێ پاك و پیرۆزێ تەڤایا ئەنفالكریا و شەهیدێن رێكا رزگارییا كوردستانێ، ئەوێن هەردەم ب هزر و رێبازا خۆ یا نەتەوەیی رێیا خەبات و خۆڕاگریێ بۆ گەلێ مە رۆناهی كرین.
سلاڤ ل خۆڕاگری، سەبر و هەدارا پڕ بەرخوەدان یا هەموو مالبات، دایك و خویشك و كەسوكارێن ئەنفالكرییان. گومان تێدا نینە، ب بەرخوەدان و ئیرادەیا پۆلایینا میللەتێ مە، زولم و زۆرداری دێ ژناڤچیت و رۆژا ئازادی و سەربەستیێ دێ هەمی جهـ و لایەنێن كوردستانێ رۆهن كەت.
