بزاڤ دھێنەکرن مووچێ چاڤدێریا خێزانێ بھێتە دەستپێکرن
ھەولێر، قائید میرۆ:
ھژمارەکا مفادارێن مووچێ چاڤدێریا خێزانی ئەڤرۆ خوەنیشادانەک ئەنجام دا و داخوازا ڤەگەڕاندنا مووچێ خوە کرن، بەرپرسەکێ وەزارەتا کاروبارێن جڤاکی ژی دبێژیت: بزاڤ یێ دھێنەکرن بۆ دوبارە ڤەگەڕاندنا مووچێ چاڤدێریا خێزانی.
محەمەد گەزنەیی، رێڤەبەرێ تۆرا جڤاکی ل ھەولێرێ بۆ ئەڤرۆ نیوز دیارکر کو بەری ھاتنا قەیرانا دارایی حوکمەتا ھەرێما کوردستانێ ب رێیا رێڤەبەراتیێن خوە مووچێ چاڤدێریا پاراستنا خێزانێ ل سەر زێدەتری ٧٠ ھزار کەسان بەلاڤ دکر و ھەر ئێک ژ وان ھەیڤانە ب مووچەکی ١٥٠ ھزار دیناری مفادار دبوو و گۆت: “پشتی بڕینا مووچە و بودجا ھەرێما کوردستانێ ژ لایێ بەغداڤە، ئەو مووچە ھاتیە راگرتن و ھەتا نوکە ژی نەھاتیە دەستپێکرن، ئەڤە د دەمەکی دایە ھژمارەکا زۆرا مفادارن مەرجێن پێدڤی تێدا ھەنە و یا فەرە ژ ئەڤی مووچێ ھەیڤانە مفادار بن”.
محەمەد گەزنەیی ئاماژە ب وێ چەندێ ژی کر، بزاڤێن وەزارەتا کاروبارێن جڤاکی د بەردەوامن بۆ ڤەگەڕاندنا مووچێ چاڤدێریا خێزانی و گۆت: “بەری نوکە ژی مە داخواز ژ سەرۆکایەتیا جڤاتا وەزیرێن ھەرێما کوردستانێ کریە، دوبارە دەست ب بەلاڤکرنا مووچێ چاڤدێریا خێزانی بھێتەکرن، راستە سالێن بۆری ب ھەر ئەگەرەکێ ھەبیت خەلکەک د لیستا مووچەی دا ھەبیت پێدڤی ب ئەڤی مووچەی نەبیت، بەلێ پتریا وان ئەون یێن چو ژێدەرێن داھاتی نەی و دێ بەردەوام ژی بین ھەتا دھێتە دەستپێکرن”.