بسپۆره‌كێ كاروبارێن سیاسی:ئۆپۆزسیۆنا نها ئه‌و شیان نینن كو بشێت ئه‌ردۆغانی ژ ده‌ستهه‌لاتێ دوور بكه‌ت
دیدار، هۆشه‌نگ تاجر:
بسپۆره‌كێ كاروبارێن سیاسی دیار دكه‌ت كو ئۆپۆزسیۆنا توركیا نه‌شێت ئه‌ردۆغانی ژ ده‌ستهه‌لاتێ دوور بكه‌ت، ترسا ئه‌ردۆغانی ژ ئۆپۆزسیۆنا ناڤخوه‌یی یا توركیا نینه، به‌لكو ئه‌ردۆغان ژ هندێ دترسیت ده‌وله‌تێن نه‌یارێن وی ب رێیا ده‌ستێوه‌ردانێ ره‌وشا توركیا ئالۆز بكه‌ن و مه‌ترسیێ بۆ وی دروست بكه‌ن.
د. ئه‌كره‌م ئۆنه‌ن ئه‌كادیمی و بسپۆرێ كاروبارێن سیاسی د دیداره‌كا تایبه‌ت دا بۆ رۆژناما ئه‌ڤرۆ دیار كر كو نها ره‌وشا ناڤخوه‌یی یا توركیا گه‌له‌ك ئالۆزه و ئه‌ردۆغانی ژی نه‌ڤێت جارێ بریارا هه‌لبژارتنێن پێشوه‌خت بده‌ت، ره‌نگه گه‌له‌ك كه‌س وه‌سا هزر بكه‌ن كو ئه‌ردۆغان ژ به‌ر ئۆپۆزسیۆنێ بریاره‌كا وه‌سا ناده‌ت، لێ ره‌وش وه‌سا نینه و د راستی دا ئه‌ردۆغان ژ پارتێن ئۆپۆزسیۆنێ ناترسیت و ئه‌و ژی باش دزانیت كو ئۆپۆزسیۆنا نها یا توركیا ئه‌و شیان نینن و نه‌شێت ژی وی ژ ده‌ستهه‌لاتێ دوور بكه‌ت و گۆت: (ره‌وشا نها یا توركیا وه‌كو به‌ری سی سالان نینه، وی ده‌می هه‌كه ئالۆزیه‌ك ناڤخوه‌یی ل توركیا دروست با یان ژی حوكمه‌ت تووشی قه‌یرانێ هاتبا دا هه‌ر زوو حوكمه‌ت ده‌ست ژ كارێ خوه به‌رده‌ت و پارته‌كا دی دهاته سه‌ر ده‌ستهه‌لاتێ، لێ ده‌مێ ئاكپارتی هاتیه سه‌ر ده‌ستهه‌لاتێ ده‌ست ب گوهۆرینا سیسته‌مێ سیاسی یێ توركیا كر، هه‌ر ژ رۆژا كو ئاكپارتی هاتیه سه‌ر ده‌ستهه‌لاتێ هه‌تا نها ب هزاران جه‌نه‌رال، ئه‌فسه‌ر و به‌رپرسێن هێزێن ئێمناهیێ و یێن هه‌والگیریێ ژ كاری هاتنه دوورخستن و نها د زیندانان دانه، ئانكۆ ئه‌ردۆغان باش دزانیت هه‌كه رۆژه‌كێ ژ ده‌ستهه‌لاتێ بهێته دوورخستن دێ ئه‌و ژی تووشی هه‌مان چاره‌نڤیسێ بیت، هه‌كه ب رێیا هه‌لبژارتنان ژی ئاكپارتی نه‌بیته ده‌ستهه‌لاتدار وان گه‌له‌ك رێیێن دی هه‌نه كو بكار بینن دا ل سه‌ر ده‌ستهه‌لاتێ بمینن، ئانكۆ ب كورتی دوورخستنا ئه‌ردۆغانی و ئاكپارتیێ ژ ده‌ستهه‌لاتێ كاره‌كێ وه‌سا ساناهی نینه و ئۆپۆزسیۆنا توركیا نه‌شێت ب رێیا ده‌نگدانێ كاره‌كێ وه‌سا بكه‌ت، وه‌كو من گۆتی ئه‌ردۆغان ژ هندێ دترسیت وه‌لاتێن كو په‌یوه‌ندیێن وان ل گه‌ل توركیا خرابن ئه‌و ده‌ستێوه‌ردانێ بكه‌ن و توركیا تووشی كاره‌ساته‌كا مه‌زن بكه‌ن كو وی ده‌می دێ بۆ ئه‌ردۆغانی گه‌له‌ك خراب بیت، ژ به‌ر هندێ ژی نها ئه‌ردۆغانی نه‌ڤێت ل توركیا هه‌لبژارتنێن پێشوه‌خت برێڤه بچن).
ئه‌كادیمیێ كورد ئه‌و یه‌ك ژی دیار كر كو توركیا نها تووشی قه‌یرانه‌كا گه‌له‌ك مه‌زن یا ئابووری هاتیه و رۆژ ب رۆژێ لیرێ توركیا ل هه‌مبه‌ر دۆلاری و پارێن دی بهایێ خوه ژ ده‌ست دده‌ت، ئه‌و یه‌ك ژی ئێكه ژ وان رێیێن كو ئه‌مریكا و وه‌لاتێن ئورۆپی ل دژی ئه‌ردۆغانی بكار دئینن دا وی نه‌چار بكه‌ن وه‌سا ژ ده‌ستهه‌لاتێ دوور بكه‌ن، بێگومان قه‌یرانا نها یا ئابووری ل توركیا قه‌یرانه‌ك گه‌له‌ك مه‌زنه و كارتێكرنا خوه ل ژیانا هه‌موو وه‌لاتیان ژی كریه و گۆت: (تشتێ نها ل توركیا روو دده‌ت وه‌كو قه‌یرانه‌كا ئابووری دهێته به‌رچاڤ لێ د راستی دا یا نها ل توركیا روو دده‌ت پتر ژ قه‌یرانه‌كا ئابووری قه‌یرانه‌كا سیاسی یه، چونكو ئه‌مریكا و وه‌لاتێن ئورۆپی دخوازن ب ڤی ره‌نگی ئه‌ردۆغانی نه‌چار بكه‌ن یان ده‌ست ژ ده‌ستهه‌لاتێ به‌رده‌ت یان ژی ل گۆر به‌رژه‌وه‌ندیێن وان كار بكه‌ت و نه‌بیته مه‌ترسی بۆ وان، ره‌نگه سه‌یر ژی بیت لێ توركیا ئێكه‌م وه‌لاتێ ئه‌ندامێ ناتۆ یه كو وه‌لاتێن ناتۆ ب خوه ده‌ست ب سزادانا توركیا كرینه و نها دۆرپێچه‌كا مه‌زن ژی ل سه‌ر توركیا هه‌یه، ئه‌و یه‌ك ژی نیشا دده‌ت كو ئه‌مریكا و وه‌لاتێن ئه‌ندامێن ناتۆ ئه‌ردۆغانی و سیسته‌مێ نها یێ توركیا بۆ خوه وه‌كو مه‌ترسی دبینن).
ناڤهاتی ئه‌و یه‌ك ژی دیار كر كو توركیا د چه‌ند سالێن بۆری دا گه‌له‌ك كار ل دژی ئه‌مریكا و وه‌لاتێن ئه‌ندامێن ناتۆ كرن، توركیا ژ ئالیه‌كێ بۆ وان دبێژیت به‌لێ ئه‌ز ئه‌نداما ناتۆ مه لێ ئه‌ز نه‌چار نینم هه‌ر تشتێ كو هه‌وه بڤێت ئه‌ز بكه‌م، ئه‌و یه‌ك ژی ب دلێ ئه‌مریكا و ئورۆپیان نینه و ژ به‌ر هندێ ژی د چه‌ند سالێن دووماهیێ دا په‌یوه‌ندیێن توركیا و وه‌لاتێن رۆژئاڤایی خراب بووینه و گۆت: (ئه‌مریكا و وه‌لاتێن ئورۆپا ژی دخوازن توركیا ته‌نگاڤ بكه‌ن دا بۆ وان مه‌ترسیان دروست نه‌كه‌ت، لێ دڤێت ئه‌م باش بزانین كو توركیا پێگه‌هه‌كێ خوه یێ ستراتیژی بۆ ئه‌مریكا و ئورۆپا هه‌یه، ئه‌و وه‌سا ب ساناهی ده‌ستان ژ توركیا به‌رناده‌ن دا توركیا پتر به‌رێ خوه بده‌ته رۆسیا، ژ به‌ر هندێ ژی مه دیت كو د چه‌ند سالێن دووماهیێ دا هنده‌ك جاران توركیا ته‌نگاڤ دكه‌ن و پاشی ژی هه‌لوه‌ستێ خوه نه‌رم دكه‌ن، لێ ئاكپارتیێ ژی سیسته‌مه‌ك گه‌له‌ك بهێز د ناڤ توركیا دا دروست كریه و بۆ هه‌ر كه‌سه‌كێ ژی ئاشكرایه كو ئاكپارتی وه‌سا ب ساناهی ده‌ست ژ ده‌ستهه‌لاتێ به‌رناده‌ت و ل ئالیێ دی ژی هه‌كه ئه‌مریكا و وه‌لاتێن ئورۆپا توركیا پتر ته‌نگاڤ بكه‌ن توركیا دشێت مه‌ترسیێ بۆ به‌رژه‌وه‌ندیێن وان دروست بكه‌ت).
د. ئه‌كره‌م ئۆنه‌ن ل دۆر پرسا كوردی ژی دیار كر د سه‌د سالێن بۆری دا ل توركیا هه‌ر هێزه‌كا سیاسی كو كوردان پشته‌ڤانی لێ كربیت شیایه سه‌ركه‌ڤیت و بهێته سه‌ر ده‌ستهه‌لاتێ، هه‌كه به‌رێ خوه بده‌ینێ هه‌تا نها ژی ژ به‌ر ده‌نگێن كوردان ئاكپارتیێ شیایه د چه‌ندین هه‌لبژارتنێن بۆری دا سه‌ركه‌ڤیت، نها هه‌ده‌پێ پێگه‌هێ خوه یێ جاران نه‌مایه، هه‌ده‌په وه‌كو جاران بهێز نینه و ل ئالیێ دی ئاكپارتیێ ژی د ناڤ كوردان دا هێزا خوه هه‌یه و د هه‌لبژارتنێن هه‌ری دووماهیێ دا ژی شیا رێژه‌كا باش ژ ده‌نگێن كوردان بده‌ستڤه بینیت و گۆت: (ره‌نگه نها پارتا كۆماریا گه‌ل گه‌له‌ك به‌حسێ كوردان و مافێ وان دكه‌ت، لێ بۆ هه‌ر كه‌سه‌كێ ئاشكرایه كو ده‌ستهه‌لاتا هه‌ری زێده ده‌ست د كوشتنا كوردان دا هه‌ی و هه‌روه‌سا كۆمكوژیا دێرسمێ و گه‌لێ زیلان و ب ده‌هان كۆمكوژیێن دی هه‌موو ل سه‌رده‌مێ ده‌ستهه‌لاتا پارتا كۆماریا گه‌ل بووینه، كورد ژ پارتا كۆماریا گه‌ل دلگرانن و ئه‌ز باوه‌ر ناكه‌م كورد پشته‌ڤانیێ ل پارتا كۆماریا گه‌ل بكه‌ن، راسته نها هه‌لوه‌ستێ ئاكپارتیێ ل هه‌مبه‌ر كوردان خرابه لێ ل گۆر نێرینا من دیسان ژی ئاكپارتی ژ بۆ مافێن كوردان ژ پارتا كۆماریا گه‌ل باشتره و هه‌موو كورد ژی ل توركیا ڤێ راستیێ باش دزانن).
