بلا داعش ژ ناڤ نهچیت
ههبوونا رێكخراوهكا تیرۆرست یا وهك داعش جیرانێ ههرێمێ، ب تایبهتی كو پارێزگهها مووسل بنگههێ وێ یێ سهرهكی یه، جهێ بهێن تهنگیا ههموو خهلكێ كوردستانێ یه. چونكه ئهم، رۆژانه هایداری رهوشا وێ خهلكی نه یێ كو ل مووسل دژیت، و ئهو ستهم و دوژمناتی یا رێكخراوا ناڤبری دژی ههر تشتهكی گرێدایی ژیانێ ئهنجام د دهت، دكهین. دیسان رۆژانه خوَرتێن كورد یێ سینگێ خوه دكهنه چهپهر بهرامبهر نههاتنا ئهڤان مرۆڤێن درنده بۆ ناڤ ئاخا كوردستانێ. لێ ژ ناڤچوونا ڤێ رێكخراوا تیرۆرستی وێ ناگههینت كو ههكه ژ ناڤ بچیت دێ دهڤهر بیته شاما شهریف و ئهم دێ گههینه ههموو هیڤی و ئومێدێن خوه. چونكه ب تنێ ئهڤه دو-سێ سالن ئهڤ رێكخراوه دهركهفتی و كو كردارێن دژی مرۆڤاتی یا وێ روَهن و ئاشكرهیه بوَ ههر كهسهكێ. ههكه زڤرینهكێ بكهین نهتهوا كورد ژ دامهزراندنا دهوڵهتا عیراقێ وهره و ههتا روخاندنا رژێما بهعس ل 2003 ههموو بزاڤ و قوربانیێن وێ ئهو بوون ئهڤ رژێم بهێته گوهوَرین، چونكه ههر دهست ههلاتدارهك هاتی مافێ كوردان پێشلكرینه. كاركرنا مه بۆ ژناڤچوونا وان مهزنتر بوو ژ كاركرنا مه بۆ پشتی وان و ههر دهم مه ئهو هزر دكر ئهگهر بچن دێ دونیا بیته شاما شهریف. باشترین نموونه پشتی روخاندنا ڤێ رژێمێ ل سالا 2003، بهری بهێته روخاندن و چهندین كونگره ل دهرڤه و نافخوه هاتنهگرێدان، لێ ههموویان ئهو چهنده نهگههاند كو یێ پشتی ڤێ رژێمێ دهێت دێ یێ چهوا ههلسوكهوتێ د گهل كوردا كهت. كوردان دیت پشتی چوونا سهدام حسێن دوژمنێ مللهتێ كورد گور ب گور، و هاتنا كهسانێن شیعی ئهوێن مه ب نافكرین كو دوستێن مهنه كو وهكی مه گهلهك زولم لێ هاتیهكرن، لێ وهكی مه هزر دكر دهرنهكهفت. ! بوومه دیاركر بوو كو گوهۆرینا كهسان ل سهر كورسیكا دهست ههلاتێ ل عیراقێ رامانا وێ ئهو نهبوو كو گوهرینا كاودانانه و سیستهم دێ هێته گۆرین و (مالكی، علاوی، جعفهری و عهبادی) ههموو ئێك هزر و بهرنامهیه. ههكهر بهری سیزده سالانه و سێزده سالان مه كار بۆ پشتی ژناڤچوونا سهدام حسێن كربا ئهڤا نوكه پهیدا نهدبوو. ههكهر مهنهشیابا خوه دناڤا پرۆگرام و سیستهمهكێ ئێكگرتیێ عیراقی دا ب گونجینن و ههموو ئالیێن عیراقی ل سهر سیستهمهكێ برێڤهبرنێ و كاركرنێ ل عیراقێ رازی بكهین، ئهم شیاین خوه بكهینه ئێك و خوه رازی بكهین و ببینه خودانێن گوتارهكا ئێكگرتی، و كاركرن و چوون ل سهر رێبهرهكێ كو بهرژوهندیا دووزا مللهتێ كورد دابیت. ئاھان نوكه ژی ههمان سیناریو یا بهری سێزده سالان یا دووباره دبیته ڤه، ههموو بزاڤ و كاركرنا مه ئهوه داعش ژ ناڤ بچیت، ئهز بێژم ما داعش كییه؟ و بۆچی هاته مووسل؟ كی ئینا؟؟ ههر پرسیارهكا بكهی گرێدایی نهتهوا عهرهبی یه، ههر ئهو دناڤ چارچووڤهی دانه، ئایا كاركرنا بۆ ژناڤچوونێ چهند زیان گههاند مه؟ مه چهند عهگید گوری ڤێ ئاخێ كرن، ئایا مه كاركریه بۆ پشتی داعش پشتی ئازادكرنا مووسل؟ ئایا مه چ كاركریه بۆ دووباره نهبوونا ڤێ روودانێ؟ ئایا ئهم وهك كورد ل سهر سیستهمهكێ رێڤهبرنێ رێككهفتینه بۆ پشتی داعش؟ ئانكو دبینم ههر چ بێته رێكامه دێ ههر ئهم ئهگهر بین چونكه ههتا نوكه مه رێبهرێ كاركرنێ و پلان نینه بۆ داهاتی. ئهو بزاڤێن سهرۆك مهسعود بارزانی بۆ ئهنجامدانا ریفراندوومێ و كاركرن بۆ پرسا سهربهخۆیێ دبینم دژاتیا ل نافخوه بۆ دهێتهكرن ژ دهرڤه كێمتر نینه. دوور نینه ئهف خهونا هاتیه پێش كو سهربهخۆیا كوردستانێ نێزیك بوویه جارهكا دی بكهڤیته مهترسیێ ڤه.
