بنگههێ لالش: سلامه‌تیا مرۆڤا گرنگتره ژ هه‌ر هه‌لكه‌فته‌كێ
ئه‌ڤرۆ نیوز، له‌زگین جوقی
ده‌سته‌یا بلندا بنگههێ لالش دیاركر كۆ پشتی جیهانا ده‌وروبه‌رێ مه ره‌شترین لاپه‌رێ مێژوویا رۆژهه‌لاتا ناڤین دا ب داوی بینیت،ئه‌و ژی باهۆزا هۆڤانه و به‌ربه‌ری یا كۆ ل سه‌ر ده‌ستێ دره‌نده‌یێن رێكخستیا داعش یا تیرۆرست هاتیه ئه‌نجام دان، سه‌ره‌رای كۆ هه‌تا نهۆ برینێن ئێزدیان سارێژ نه‌بووینه ژ كریارێن هۆڤانه‌یێن چه‌په‌لێن چه‌كدارێن داعش، ئه‌م ژی وه‌ك هه‌موو جیهانێ رووب روویێ ڤایرۆسێ كورونایێ بووین و شێوازه‌كێ ژیانێ یێ جێواز ل سه‌ر مه هاته سه‌پاندن كو به‌ری نهۆ ب سه‌ر مه‌دا نه‌هاتبوو،وه‌ك كه‌ره‌نتینه‌كرنا ساخله‌می و سنوورداكرنا بزاڤێن قه‌ده‌غه‌كرنا خرڤه‌بوونێن مرۆڤایه‌تی ب ته‌ڤایا هه‌لكه‌فتێن جڤاكی و ئایینی و هتد.
ده‌سته‌یا بلندا بنگههێ لالش ئه‌و چه‌نده ژی دیاركر كۆ دڤان كاودانێن نه سروشتی دا، جه‌ژنا سه‌ر سالێ ب سه‌ر مه دادهێت(سه‌ر سالا ئێزدیان)، ئه‌م ب هیڤی نه كه‌یف و شادی لگه‌ل وه و هه‌موو مرۆڤایه‌تی بێته پاراستن ژڤێ نه‌خۆشیێ،و ئه‌م داخواز دكه‌ین ئه‌ڤ جه‌ژنه ببته هه‌لكه‌فته‌كا خۆشیێ و هنده‌ك ژ شادیێ بۆ ئێزدیان بزڤرینه دڤان كاودانێن ب سه‌رێ ئێزدیا دا هاتین دڤان چه‌ند سالێن بۆری دا.
ئه‌و چه‌نده‌ژی دیاركر كۆ ئه‌م ل ده‌سته‌یا بلندا بنگههێ لالش یێ ره‌وشه‌نبیری و جڤاكی دا ، ئه‌م ژی پالپشتین بۆ ڤان پێرابوونێن هاتینه ده‌ركرن ژلایێ حكومه‌تا ههرێما كوردستانێ ژبۆ رووب روو بوونا ڤایرۆسێ كورونایێ، ئه‌و پێرابوون یێن بووینه جیێ متمانه‌یا رێكخراوێن ساخله‌میێ یێن نێڤ ده‌وله‌تی، هاته دووپاتكرن كو سه‌ركردایه‌تیا ههرێما كوردستانێ گه‌له‌ك داكوكه ل سه‌ر گه‌لێ خۆ و یه به‌رهه‌ڤه بۆ قوربانیدانێ ب گه‌له‌ك ده‌ستكه‌فتێن ئابووری ژپێخه‌مه‌تا پاراستنا ژیانا وه‌لاتیێن كوردستانێ.
بنگههێ لالش د بهانگه‌وازیه‌كێ دا داخوازێ ژ خه‌لكێ خۆ یێ ئێزدی ل ههرێما كوردستانێ دكه‌ن، ل كه‌مپێن ئاواران دا، ل ده‌ڤه‌رێن گرێدایی ماددی 140 ژ ده‌ستوورێ عێراقا فیدرال، پێگیریه‌كا ته‌مام بكه‌ن ب ئاراسته و رێنمایێن هاتینه ده‌ركرن ژده‌سهه‌لاتێن كارگێری و ساخله‌می و ئه‌منی ژپێخه‌مه‌تی پاراستنا ژیانا وان و خێزانێن وان یێن خۆشتفی، ژبه‌ركو سلامه‌تیا مرۆڤا گرنگتره ژ هه‌ر ئاهه‌نگه‌كێ كو د سالێن بێت دا د ده‌رفه‌ت دایه بێنه گێران ب ئانه‌هیا خودێ.