بهار ئامێدی: کار ل سەر دروستکرنا قوتابخانەکا ئەلکترونی دکەت
ئەڤرۆ
دهۆك، نەوزاد هلۆری:
ل ڤان سالێن دوماهیێ حوکمەتا هەرێما کوردستانێ د هندەک سکتەر و فەرمانگەهان دا پەنا بریە بەر مامەلێن ئەلیکترونی، بەلێ وەکو پێدڤی نیە، خودانا هزرا ب ئەلیکترونیکرنا مامەلێن حوکمەتێ دناف فەرمانگەهان ژی دا بەحس ل گرنگی یا ب ئەلیکترونیکرنا کاروارێن فەرمانگەهان و گرنگیدان ب زانست و تەکنولوژیایێ دکەت.
بهار ئامێدی، پروگرامسازا کورد ل دهوکێ بۆ رۆژناما ئەڤرۆ گوت: (زانست و تەکنولوژیا ل جیهانێ رۆژ بۆ رۆژ بەر ب پێشکەفتن و داهێنانێن نوێ یە و ب رێیا وان کارئاسانیێن هەری زۆر کەفتنە ژیانا مروڤی و کار بلەز و باشتر و ساناهی تر ب رێڤە دچن و تێچو و دەم ژی کێمتر دبیت، لەوا دڤێت ل کوردستانێ ژی گرنگی ب سیستەم و زانست و تەکنولوژیایێ بهێتەدان، ئێکەم پێنگاڤ ژی دڤیت وانا کومپیوتەری دناڤ قوتابخانان بهێتە کاراکرن بو هندێ بشێن جیلەکێ نوو ئاڤا بکەین).
زێدەتر گوت: (ئەز نوکە کار ل سەر قوتابخانەکا ئەلیکترونی دکەم، کو ب رێیا ڤێ قوتابخانێ قوتابی دشێن پتر ژ جارەکێ گوهداریا ماموستایێ خوە بکەن یان وانەیان بکەن، ئەڤە ژبلی کو دێ دەمەکێ زور بۆ مروڤی زڤریت ڤە، ئەڤ قوتابخانە دێ ب رێیا ئەپلیکیشنەکێ هێتە دروستکرن و هەر قوتابیەک ب رێیا ناڤ و پاسوردەکێ تایبەت هێنە گرێدان ب وێ قوتابخانێڤە، ئەز دشێم بو ئالیێن شولەژێ هەڤکاربم کو ئەڤ یەک ببیتە پرۆژەکێ سەرتاسەری ل کوردستانێ، دیسان ئەز پێشنیار دکەم کو وانەکا رەوشتی ل قوتابخانێ بهێتە زێدەکرن، دیسان وانەکا دی ژی ل سیستەمێ خواندنێ بهێتە زیدەکرن کو تێدا قوتابی ب رێیا دروستکرن و خراپکرنا تشتەکێ بهێتە فێرکرن ژبەرکو ئەگەر قوتابی شیا تشتەکێ خراپ کەت و چێکەت ڤە دێ ل وی دەمی داهێنان و داهێنەر دروست بن).
بهارێ د درێژاهیا ئاخفتنێن خودا دیارکر ژی کو ددەما بوری دا ئەوێ ب رێیا دروستکرنا چەندین بەرنامەیان خزمەتا زانست و بوارێ تەکنولوژیایێ ل کوردستانێ کریە و گوت ژی: (نوکە من هەماهەنگیێن زانستی و تەکنولوژی ل گەل هندەک ژ وەلاتێن جیهانێ دروستکریە، ژ وانان ئەمریکا و نیوزلەندا، کو ئەڤ یەک ژی جهێ شانازیێ یە، ئەز دێ ل سەر کار و خزمەتێن خوە بو پێگەهاندنا جیلەکێ نوێ و پێشڤەبرنا ئاستێ زانست و تەکنولوژیایێ بەردەوام بن).
