بهایێ هندهك ئاهێن خوارنێ دێ ئهرزان بیت
ههولێر، سولین سلێمان:
وهزارهتا بازرگانیا ههرێما كوردستانێ دیار كر، ئهو ل دووڤ بڕیارێن حوكمهتا ههرێمێ بهایێ ئاهێن خوارنێ ئهرزان دكهن، د نوكه ژی دا بهایێ ئاری و هندهك كهلوپهلێن دی یێن خوارنێ د ناڤ بازارێن ههرێما كوردستانێ دا ئهرزان بوویه.
نهوزاد شێخ كامل، رێڤهبهرێ گشتیێ بازرگانی ل وهزارهتا بازرگانیا حوكمهتا ههرێما كوردستانێ بۆ رۆژناما ئهڤرۆ دیار كر، ئهو بهردهوام كار ل سهر ئهرزانكرنا بهایێ هندهك جۆرێن كهرهستهیێن خوارنێ دكهن و گۆت: “مه د ناڤ بازارێن ههرێمێ دا باج ل سهر گهلهك پێدڤیێن سهرهكیێن خوارنێ راكریه، داكو بهایێ وان ئهرزان ببیت”.
خویا ژی كر، د نوكه دا بهایێ ئاری ئهرزان بوویه و بهردهوام بزاڤ دهێنه كرن، كو بهایێ ههموو كهرهستهیێن خوارنێ ئهرزان ببیت، ئهڤه ژی د بهرژهوهندیا وهلاتیان دایه و گۆت: “ئهڤه دهمێ چار مههانه باج ل سهر پتر ژ 17 جۆرێن كهرهستهیێن خوارنێ هاتیه راكرن”.
گۆتژی: “مه ئهڤ بڕیاره پێخهمهت هاریكاریا وهلاتیان داینه، چونكی د نوكه دا ژ ئهگهرێ شهڕێ رووسیا و ئوكراینا ل تهڤایا جیهانی قهیرانا خوارنێ پهیدا بوویه و بهایێ كهلوپهلێن خوارنێ گهلهك بلند بوویه”.