بهایێ گۆشتی دێ ئەرزان بیت
هەولێر، قائید میرۆ:
بەرپرسەكێ وەزارەتا چاندنا ئیراقێ راگەهاند، چەندین بڕیار بۆ ئەرزانكرنا بهایێ گوشتێ سۆر ل ئیراقێ هاتینە دەركرن و هەموو بزاڤەك یا دهێتە كرن بۆ مەها رەمەزانێ بهایێ گوشتی بهێتە كۆنتڕۆلكرن و زێدەتر بلند نەبیت.
سیپان شێروانی، ئەندامێ لیژنا ئابووری ل پەرلەمانێ ئیراقێ بۆ رۆژناما ئەڤرۆ دیار كر، لیژنا ئابووری چاڤدێریا رەوشا بازاڕی دكەت، ب تایبەتی بلندبوونا بهایێ گوشتی ل بازاڕێن ئیراقێ و گۆت: «حوكمەت هاتیەراسپاردن هەموو بزاڤەكێ بكەت بۆ ئەرزانكرنا بهایێ گوشتی و كۆنتڕۆلكرنا بازاڕی، چونكی بهایێ گوشتی ب شێوەیەكێ بەرچاڤ بلندبوویە و د شیانێن وەلاتیان دا نینە گوشتی بكڕن، نوكە ل بازاڕێن ئیراق و كوردستانێ كیلۆیا گوشتێ سۆر گەهشتیە ئاستەكێ بلند».
ژ ئالیێ خوەڤە ژی مەهدی جبوری، بریكارێ وەزارەتا چاندنا ئیراقێرا گەهاند، چەندین رێكار هاتینە دیاركرن بۆ كۆنتڕۆلكرنا بهایێ گوشتی، ژ وان: ئینانا تەرش و كەوالی ل وەلاتێن جیهانێ و پشتەڤانیكرنا پڕۆژەیێن تەرش و كەوالی هەتا بهایێ گوشتی بۆ مەها رەمەزانێ بهێتە ئەرزانكرن و گۆت: «ئەم پشتڕاستین دێ بڕیارێن حوكمەتێ كاریگەری ل سەر بازاڕی هەبن و بهایێ گوشتی وەكی نوكە نامینیت».
