به‌رهه‌مێ ناڤخوه‌یی بۆ ده‌رڤه‌ی كوردستانێ دێ هێته هنارتن
دهۆك، له‌زگین جوقی:
سه‌رۆكێ ئێكه‌تیا هاوه‌رده و هنارتنێ ل پارێزگه‌ها دهۆكێ دیار كر كو ئه‌ڤ ساله پلان هاتیه دانان كارگه‌ه بهێنه دروستكرن و ئێدی نه بتنێ كه‌ره‌ستێن خوارنێ و ڤه‌خوارنێ و ناڤمالێ و هه‌موو جۆرێن دی یێن كه‌ره‌ستان بهێنه هاوه‌رده كرن، به‌لكو پلان وه‌سایه ئه‌م ده‌ست ب هنارتنێ بۆ ژ ده‌رڤه‌ی وه‌لاتی و پارێزگه‌هێن دی یێن عیراقێ ژی بكه‌ین.
رێبه‌ر ئیبراهیم، سه‌رۆكێ ئێكه‌تیا هاوه‌رده و هنارتنێ ل پارێزگه‌ها دهۆكێ بۆ رۆژناما ئه‌ڤرۆ دیار كر كو نوكه ره‌وشا هاوه‌رده‌كرنێ باشتر بوویه و كاره‌كێ باش دهێته كرن پشتی زالگه‌هێن د ناڤبه‌را عیراقێ و هه‌رێما كوردستانێ دا هاتینه راكرن و نه‌ماین بازرگانێن مه پتر كه‌ره‌ستان ره‌وانه‌ی پارێزگه‌هێن باشوور و ناڤه‌راستا عیراقێ دكه‌ن، لێ جارێ هنارتن مه نینه و گۆت: “نوكه پلان هه‌یه كارگه‌ه بهێنه دانان و بازرگان ده‌ست بكارێ هنارتنا به‌رهه‌مێ ناڤخوه‌یی بۆ ده‌رڤه‌ی سنوورێن هه‌رێما كوردستانێ بكه‌ن، ئه‌ڤه ژی دێ بیته هانده‌ر كار باشتر بیت د هه‌موو واره‌كی دا ل دهۆكێ، نوكه ل دهۆكێ پتر كارێ هاوه‌رده كرنێ دهێته كرن، هه‌كه كارگه‌ه ل دهۆكێ بهێنه دانان دێ كارێ هنارتنێ ژی ده‌ست پێ كه‌ت”.
رێبه‌ری ئاماژه ب وێ چه‌ندێ ژی كر كو كه‌ره‌ستێن توركی و ئیرانی و به‌رازیلی و چینی و ئوكرانی پتر دهێنه هاوه‌رده كرن بۆ هه‌رێما كوردستانێ و پارێزگه‌ها دهۆكێ و گۆت: “ل ناڤخوه‌یی ژی كارگه‌هێن زه‌یتێ و كه‌ره‌ستێن خوارنێ هاتینه دانان و ئه‌م گه‌شبینین ئه‌ڤ ساله كار باشتر بیت و ره‌وشا بازرگانی د وارێ هاوه‌رده و هنارتنێ ژی دا باشتر لێ بهێت”.
