بهرپرسهكێ وهزارهتا شههیدان: ژبهر چاكسازیێ ههتا نوكه مووچێ 11 هزار كهسان هاتیه بڕین
ههولێر، قائید میرۆ
ل ههموو وهزارهت و فهرمانگههێن حوكمهتێ لیژنه بۆ بجهئینانا قانوونا چاكسازیێ هاتینه پێكئینان و ل وهزارهتا شههید و ئهنفالكریان ژی لیژنهیهكا بلند بۆ ئهنجامدانا چاكسازیێ هاتیه پێكئینان. بهرپرسهكێ وهزارهتێ ژی ئاشكرا كر، ژ ئهنجامێ بڕێڤهچوونا چاكسازیێ د ناڤا وهزارهتا كارۆبارێن شههیدان و ئهنفالكریان د قۆناغا ئێكێ دا مووچه و مینحێ 11 هزار كهسان یێن نهقانوونی هاتینه تۆماركرن و مفاداربووینه ل مووچێ حوكمهتا ههرێما كوردستانێ هاتیه بڕین.
عادل حهمه سالح، بهرپرسێ راگههاندنا وهزارهتا كارۆبارێن شههید و ئهنفالكریان بۆ رۆژناما ئهڤرۆ دیار كر “پشتی دهرچوونا قانوونا هژماره 2 یا تایبهت ب چاكسازیێ ژلایێ حوكمهتا ههرێما كوردستانێ رێنمایی بۆ بجهئینانا ڤێ قانوونێ هاتینه دهركرن و پرۆسا چاكسازیێ ل دهرماله و مووچه و شایستهیێن مادی ل ههموو كهرتان هاتینه دهستپێكرن.
زێدهتر گۆت: ژلایێ وهزارهتا كارۆبارێن شههید و ئهنفالكریان ژی پشتی گههشتنا بڕیارا سهرۆكایهتیا جڤاتا وهزیران لیژنهكا بلند یا چاكسازیێ ب سهرۆكایهتیا عهبدولایێ حاجی مهحموود وهزیرێ شههیدان هاتیه پێكئینان و ل ههموو رێڤهبهرایهتی و پارێزگههان ژی چهندین لیژنه بۆ ئهنجامدانا چاكسازیێ هاتینه پێك ئینان، واته ژبلی لیژنهیا بلند لسهر ئاستێ وهزارهتێ لیژنهیێن لاوهكی ژی هاتینه پێك ئینان.
خویاژی كرن د دهمێ نوكه دا پرۆسا چاكسازیێ ل وهزارهتا شههیدان یا بهردهوامه و ڤاڤارتن بۆ بادهكێن شههیدان و زیندانیێن سیاسی و تاقانهیێن ئهنفالێ دهێتهكرن، ژ ئهنجامێ بڕێڤهچوونا پرۆسا چاكسازیێ بهزاران بادهك هاتینه ئێكلاكرن و هێشتاژی پرۆسا ڤاڤارتنا بادهكان یا بهردهوامه، لیژنهیێن وهزارهتێ رۆژانه د ئهركدانه بۆ ئهنجامداا چاكسازیێ، چونكه پڕۆسهیهكا بهردهوامه.
عادل حهمه سالح گۆت ژی” پێنگاڤێن باش ههتا نوكه هاتینه هاڤێتن و ئهنجام ژی ههبووینه، چونكو ژ ئهنجامێ ڤێ چاكسازیا ههتا نوكه هاتیه ئهنجامدان مووچه و مینحێ 11 هزار كهسان هاتیه بڕین ههموو ژی ئهو كهسن یێن نه قانوونی مفاداربووین ژ وهرگرتنا مووچێ حوكمهتێ.
زێدهتر دبێژیت: ههروهسا وهزارهتا كاروبارێن شههید و ئهنفالكریان شیایه ههیڤانه نێزیكی 986 ملیۆن دیناران بۆ خهزینا حوكمهتا ههرێما كوردستانێ ڤهگهڕینیت، رۆژانه كار یێ دهێتهكرن بۆ ڤێ چهندێ ههموو ئهو كهسێن سالێن بۆری ژ دهرڤهی قانوونێ مفاداربووینه و ناڤێن وان ناڤا لیستا شههیدان یان زیندانیێن سیاسی هاتیه تۆماركرن بهێنه لادان و دێ بهردهوام ژی كار هێتهكرن ههتا دگههینه ئهنجامێ دووماهیێ، ههموو كهسێن مووچه و مینحێ وان دهێته بڕین پشتی پێداچوونێ یه ل گۆرهی قانوونا چاكسازیێ بۆ ڤهگهڕاندنا عهدالهتێ.