به‌رێ پیڤازا ژی نه‌ما
ب مخابنیڤه ده‌مێ چوویمه ئامێدیێ من دیت كو به‌رێ پیڤازا ژ به‌ر چێكرنا رێكا ئامێدیێ هاته په‌قاندن.
د هه‌ر وه‌لاته‌كی یان ده‌ڤه‌ر و باژێره‌كی و گونده‌كی دا هنده‌ك شوونه‌وار (معالم) هه‌نه كو دبنه لایه‌نه‌كێ دیروَكا وی جهی، خه‌لك بگرنكی ڤه سه‌حدكه‌نه وان شوونوارا و دپارێزن چنكو شوونوار به‌لگه‌یێن زیندی نه دیروَكا هه‌ر ملله‌ته‌كی دا له‌ورا تێنه پاراستن چ ژ لایێ حكومه‌تا ڤه یان ژی ژ لایێ خه‌لكی ڤه له‌ورا هه‌ر ملله‌ته‌ك رابویه ج ئه‌ف شوونواره دجهدا پاراستینه یان ژی د گه‌له‌ریان دا كوَمكرینه.
هه‌ر دكه‌ڤندا شوونوارێت كوردستانێ وه‌كی ملله‌تێ وێ كه‌فتینه لبه‌ر هێرشێن تالان و دزیان و ژناڤبرنێ و باشترین نموونه برنا په‌یكه‌رێ شكه‌فتا هه‌لامه‌تا، ژ لایێ گه‌روَكێ بریتانی هنری بندی ڤه‌یه، برنا زوَربه‌یا هه‌ره زوَرا هه‌ستیكێن موفێن نیاندرتال و پاشماوێن وان ل شكه‌فتێن كوردستانێ وتائڤه روژی ئه‌ف چه‌نده یا به‌رده‌وامه ژ دزین و برنا شینوارێت كوردستانێ چنكو ئه‌ف، شوونوارێن دێرین ژ لایێ مه‌ڤه نه‌هاتینه پاراستن ژ هه‌ر لایه‌كی ڤه‌بیت و گرنكی نه‌دانا مه بڤی لایه‌نێ دیرۆكی وه‌كریه كۆ بیردانكا مه ب پاراستنا به‌رمایێن باب كالێن مه نه‌هاتیه په‌روه‌رده‌كرن و ئه‌ڤه هه‌ستا گرێدانا ب ئاخا وه‌ڵاتی ڤه ڵاواز دكه‌ت، له‌ورا هه‌رده‌م بوینه پاریه‌كێ حازر د ده‌ستێ خه‌لكه‌كی دا.
له‌ورا گه‌له‌ك جاران ژی ژ به‌ر بێ خه‌میا مه ئه‌م ب خوه بووینه ئه‌گه‌رێت ژناڤچوونا ڤان شوونوارا چ خرابكرنا هنده‌ك شوونوارێن خه‌نس یانژی ل گه‌له‌ك جهێن دی، له‌ورا ئه‌ڤروَ به‌رێ پیڤازا ژی كه‌فته به‌رنه‌مانێ و هاته ژناڤبرن ب هێجه‌تا خوه‌شكرن و فره‌هكرنا رێكا ئامێدیێ؛ ئه‌و كومپانیا ڤێ رێكێ چێ دكه‌ت رابوویه ئه‌ڤ به‌رێ دیروَكی پرت پرت كریه و هاڤێتی یه، مخابن كه‌سه‌ك نه‌بوویه خوه لێ بكه‌ته خوَدان و نه‌هێلن ڤی به‌ری ژناڤ ببه‌ن، كو بوویه ئێك ژ سمبوَلێت دیروَكی یێت باژێرێ ئامێدیێ هه‌ر دگه‌ل هه‌بوونا ڤی باژێری تاكو نوكه.
ناڤ و ده‌نگێن به‌رێ پیڤازا حه‌تا ئه‌ورپا چوویه، بوَ نموونه هه‌ڤاله‌كێ من بوَ من گوت: ده‌مێ ل سوێد دا ( لجوئێ ) ده‌نه من حاكمی پرسیار ژ من كر و گوت: تو خه‌لكێ كیژده‌رێیی من گوتێ: كوردستانا عیراقێ وی گوت: كیش ده‌ڤه‌رێ كیش باژێری من گوتێ: ئه‌ز خه‌لكێ باژێرێ ئامێدیێ مه پاشی گوته من باشه دێ پرسیاره‌كا ئامێدیێ ژته كه‌م و من ژی گوتێ كه‌ره‌مكه: ئینا گوته من (به‌رێ پیڤازا دكه‌فیته كیش لایێ ئامێدیێ) به‌لێ من نه‌زانی به‌رسڤا دروست بده‌م و من گوتێ: ئه‌ز خه‌لكێ گوندێت ده‌ڤه‌را ئامێدیێ مه تاكو بوَ وی قه‌ناعه‌ت چێبوی و( لجوْ) دایه‌من.
به‌لێ حه‌تا حكومه‌ت و خه‌لكێن بیانی ژی گرنگیێ ب جهێن مه یێن شوونواری د ده‌ن و ئه‌م گرنگیێ پێناده‌ین به‌لكو ب مخابنیڤه هه‌ر بوَ مه خه‌م ژی نینه و له‌ورا هه‌ر روَژ ئه‌م یێ دبینین كو شوونوارێت ملله‌تێ مه یێت ژناڤ دچن و روَژه‌ك دێ هێتن دێ په‌شیمان بین و پاشی فایده ناكه‌ت.
له‌ورا هیڤدارم ل پاراستنا دیروَكا ملله‌تێ خوه ئه‌م هه‌موو خوه لێ بكه‌ینه خوَدان داكو وه‌كو په‌یكه‌رێ شكه‌فتا هه‌لامه‌تا نه‌هێنه دزین یان ژی وه‌كی به‌رێ پیڤازا ل ئامێدیێ نه‌هێنه په‌قاندن چنكو پاراستنا وان شوونوار ا ئه‌ركێ مه هه‌میانه.
