بووکا کوردان ئێدی شوو ناکەت
ئەڤرۆ:
سترانبێژا ناڤدارا لوبنانی نەجوا کەرەمێ دیارکر پشتی ھزرکرنەکا کوور وێ بڕیارا خوە یا دووماھیێ دایە، کو ئەو ژی ئێدی شوو ناکەت.
ناڤھاتی دبێژیت: دەمێ من بۆ جارا ئێکی شووکری ئەز دھەلبژارتنا خوەدا یا سەرکەفتی نەبووم، ژبەرکو ھەر زوو گەلەک ناکۆکی ھاتنە پێش و پشتی دەمەکی ئەم ژێکڤە بووین.
دووڤدا گۆت: پشتی ئەز زڤریمە مالا خوە گەلەک کەس ھاتنە خوازگینیێن من، کو ھندەک ژوان بازرگان بوون، ھەروەسا ھندەک ژی ھونەرمەند و ھونەر دوست بوون، لێ من ھەموو رەتکرن و من باشی زانی کو ئێدی شوو نەکە مەڤە، ژبەرکو ئەز دزانم من شەنس نینە و ھەکا جارەکا دی ژی شوو بکەم دێ ھەر من ئاریشە ھەبن، چونکو مادەم ئەز سترانبێژم دێ ھەر چەند رۆژەکان جارەکێ ژبۆ گێرانا کونسێرتان چمە وەلاتەکی و دبیت ھەڤژینێ من وێ دەلیڤێ نە دەتە من.
ل دووماھیێ گۆت: بۆ سالا نوو 2015 من ھژمارەکا سترانان یا بەرھەڤکری، لێ ئەز جارێ زێدەتر ل سەر نائاخڤم و من دڤێت بکەمە سپرایز.
دھێتە زانین کو بەری نوکە ناڤبریێ شوو ب کوردەکێ لوبنانێ کربوو، کو ئەو ژی بۆ دەمەکی رێڤەبەرێ کارۆبارێن وێ یێن ھونەری بوو ب ناڤێ (یوسف حەرب) ژ بەر ھندێ ل وی دەمی گەلەک کەنالێن راگەھاندنێ دەمێ بەحسێ وێ دکر دگۆتنێ (بووکا کوردان).
