بڕیارەكا دژوارە دژی پیتەر گۆرگیسی و ڕاهێنەر بەرپرسیارە
قەیس وەیس:
پشتی ڕاگەهاندنا پێكهاتیێ هەلبژارتیێ ئیراقێ بۆ مۆندیالا جیهانی 2026ێ پێلەكا نەڕازیبوونێ دناڤا جادا وەرزشی دا پەیدابوویە و پرانییا وان دخوازان زووترین دەم دڤێت پیتەر گۆرگیس ڤەگەرینە دناڤ تیمێ دا ژبەر ئاست و شیانێن وی و دیسان دوەمین گۆلكەرێ خولا ستێرێن ئیراقێ یە ب 19 گۆلان.
د دیدارەكێ دا لوەئی سەلاح شرۆڤەكارێ وەرزشی و ڕاهێنەرێ بەرنیاس یێ ئیراقێ سەرسۆرمانییا خوە دیاركر ب دوورئێخستنا پیتەر گۆرگیسی و حەسەن عەبدولكەریم-قۆقێی- و گۆت: زۆلمەكا بەرچاڤ یا هاتیە كرن ل سەر ئەڤان هەردو یاریزانان تایبەت پیتەر گۆرگیسی كو بڕیارەكا ستەمە، ئەز نزانم ڕاهێنەرێ هەلبژارتیێ مە ب چ شێوەیە دۆڤچوونا خولێ كرییە، نە یا ڕەوایە یاریزانەكێ خودان شیان و گۆلكەرێ دویێ بیت یێ خولێ و ئەگەرێ سەرەكی یێ گەلەك سەركەڤتێن تیما خوە بیت و نە هێتە داخوازكرن، سەیرە ئەوا هاتیە روودان.
هەروەسان گۆت: داتایێن پیتەری د وەرزێ ئەڤ سالە دا نموونەیە، شیایە 19 گۆلان تۆماربكەت كو دبیتە هژمارا گۆلێن هەر چار یاریزانێن هێلا هێرشبرنێ یا هەلبژارتیێ ئیراقێ، من چو پەیوەندیێن هەڤالینی دگەل وان نینن لێ وەكو وەرزشڤانەك و چاڤدێرەك دبینم ستەمەكا مەزن ل پیتەری و قۆقێی هاتیە كرن، یاریزانەكێ وەكو ئیبراهیم بایش نەشیایە یا پێدڤی نیشان بدەت و ئاستێ وی گەلەك كێمترە ژ پیتەری، بدیتنا من ڕاهێنەر بەرپرسیارە و شاشیەكا مەزنە دگەل هەلبژارتیێ ئیراقێ نە هێلاین، دێ تووشی ئاستەنگا بیت.
هەژی گۆتنێ یە هەلبژارتیێ ئیراقێ د كۆما نەهێ دایە دێ یارییا خوە یا ئێكێ ل 17ێ ڤێ مەهێ بەرانبەر هەلبژارتیێ نەرۆیج ل دەمژمێر ئێكی سپێدێ كەت، یارییا دویێ بەرانبەر هەلبژارتیێ فرەنسا ل 23ێ هەمان مەهـ ل 12ێ شەڤێ كەت، یارییا سێیێ دێ بەرانبەر هەلبژارتیێ سینیگال ل26ێ ڤێ مەهێ ل دەمژمێر 10ی شەڤ كەت.
