بڕیارەكا نوو بۆ قوتابیێن پێشكێشی ماستەر و دكتۆرایێ كری هاتەدان
وەزارەتا خواندنا بلند یا حوكمەتا هەرێما كوردستانێ بڕیارەك بۆ قوتابیێن پێشكێشی خواندنا دبلۆم، ماستەر و دكتۆرایێ كری و د ئەزموونێ دا ب سەركەفتین و ژ بەر نەبوونا كورسیان نەهاتینە وەرگرتن دەرئێخست.
بڕیارا وەزارەتا خواندنا بلند ژ وان قوتابیان دگریت یێن د ئەزموونێن توانستی دا سەركەفتین، لێ ژ بەر نەمانا كورسیان نەهاتینە وەرگرتن و تێدا هاتیە، دەستهەلات ب جڤاتێن زانكۆیان دێ هێتە دان ب رێكا ڤەگوهاستنێ (موناقەلە) كورسیان ل هەمان پشكا زانستی یان زێدەكرنا كورسیان ل گۆرەی شیانێن پشكێن زانستی یان ب هەڤپشكیا زانستی د ناڤبەرا زانكۆیان دا كورسیێن خواندنا دبلۆم، ماستەر و دكتۆرایێ بۆ بەردەست بكەن و هەر كورسیەكا بهێتە زێدەكرن دێ ب پارالێل بیت.
هەروەسا هاتیە، ئەگەر زانكۆ نەشیا كورسیێن خواندنێ بۆ پشكەكا دەرچوویان بەردەست بكەت ب رێكا وان خالێن هاتین، ئەو قوتابی ب وەرگرتی دێ هێنە هژماركرن، لێ خواندنا خوە دێ ل گەل خۆلا بهێت دەستپێكەن.
