بھایێ پانزینێ دێ ھەر ب ئەرزانی مینیت
ئەڤرۆ نیۆز، قائید میرۆ:
چەند رۆژەکە بھایێ پانزینێ ل ھەرێما کوردستانێ داکەفتیە و شارەزایەکێ کەرتێ پەتڕۆلێ ژی دبێژیت، دێ بھایێ پانزین ھەر ب ئەرزانی بمینیت بۆ دەمەکێ درێژ.
ھێژا شێخ تەھا، شارەزایێ کەرتێ پەتڕۆلێ بۆ ئەڤرۆ نیۆز دیارکر” بھایێ پەتڕۆلێ لسەر ئاستێ جیھانێ داکەفتنەکا مەزن تۆمار کریە و پانزینەکا زۆر ل ھەرێما کوردستانێ ھاتیە عەمبارکرن، ئەڤە ژی بۆ ئەگەر بھایێ پانزین ئەرزان ببیت، نوکە ل پڕانیا پانزینخانا ئێک لیترا پانزینا نۆڕمال گەھشتیە ٤٥٠ دیناران و ئەز باوەرم دێ گەھیتە ٤٠٠ دیناران ژی.
ئەڤی شارەزایێ پەتڕۆلێ گۆت: (ژبلی داکەفتنا بھایێ پەتڕۆلێ ئەو مادەیێن پانزینێ دروست دکەن ئەو ژی ب شێوەیەکێ بەرچاڤ داکەتینە، بۆ نموونە بەری ڤایرۆسێ کۆرۆنایێ ئێک تەنێ مادێ چێکرنا پانزینێ مە ل ئیرانێ ب ٥٠٠ دۆلاران دکڕی نوکە ھەمان مادە تەن ب ٢٦٠ دۆلارانە).
ھێژا شێخ تەھا ئاشکراکر” بھایێ پانزینێ دێ بۆدەمەکێ درێژی بڤی شێوەی مینیت، بەلێ دووماھیێ پانزی ژی وەکی ھەر کەلوپەلەکێ دی دێ گۆھۆڕین کەڤنە بھایێ پانزینێ، بەلێ بھایێ نوکە یێ گونجایە چ ل ھەرێما کوردستانێ بیت یان ژی دەڤەرێ ب گشتی.