بۆ جارا ئێكێ بنیاتێ فێستیڤالان ژ بامەڕنێ دەستپێكریە
سندس سالح سلێڤانەیی
عایشە شەكەت بامەرنی، كو ئێك ژ ڕێكخەرێن فێستیڤالا دانیكان بوو، ئەوا بەری چەند ڕۆژان ل ناحیا (بامەرنێ) هاتیە گێڕان، د دیدارەكێ دا گۆت: ژبەركو هەر دكەڤندا ل دەڤەرا بامەرنێ گرنگی ب خواندنێ دهاتە دان و گەلەك كەسێن ڕەوشەنبیر ژوێ دەڤەرێ رابووینە و گرنگی ب ئەدەب و كلتۆرێ كوردی داینە، لەورا ڕەوشەنبیرێن وێ دەڤەرێ هەردەم هزر كرینە تشتەكێ نوو بینە هەبوونێ، ئەو بوو ل سالا 2012 بۆ جارا ئێكێ فێستیڤالا دانیكان ل بامەرنێ هاتە گێڕان و ئێدی ئەڤ چەندە بوو كلتۆرەك و سالانە فێستیڤال دهێتە گێڕان.
هەروەسا گۆت: پشتی وێ فێستیڤالێ ل دەڤەرێن دی ژی ئەڤ چەندە بوو كلتوورەك و نوكە ب دەهان فێستیڤالێن جۆرا و جۆر دهێتە گێڕان و هەلبەت ئەڤ چەندە جهێ دلخۆشیا مەیە و چنكو ل دەمێ گێڕانا هەر جۆرە فێستیڤالەكێ خەلكەك ب گەرمی پێشوازیێ لێ دكەن، هەروەسا دەلیڤەیێن فرۆتنێ پترل بەر جۆتیاران ڤەدبن و ئەڤ چەندە دبیتە ئەگەر كو بۆارێ ئابووری ل دەڤەرێ پتر بەر ب پێشڤەبچیت و بهێزتر لێ بهێت.
