بۆ جارا ئێكێ یە د دیرۆكا قارەمانیێن مەزن دا 18 یاری د ئێك رۆژ دا بهێنە كرن
چاڤەڕێ دهێتە كرن ئەڤرۆ هەڤڕكیێن قۆناغا كۆمان یا قارەمانییا یانەیێن ئۆرۆپا قارەمانێن خولا چامپیۆنز لیگ ب دووماهی بهێن ب ئەنجامدانا 18 یارییان د ئێك دەمژمێر دا كو بڕیارە ل 11ێ شەڤێ بهێنە ئەنجامدان ئەوا دهێتە هژمارتن بۆ جارا ئێكێ یە د دیرۆكا یاریێن قارەمانیەكا نێڤدەولەتی چ یا چامپیۆنز بیت یان كۆپا ئەڤ ڕێژەیا یارییان ب دیدارێن ئاگرین و چارەنڤیس دناڤبەرا مەزنە یانەیێن ئۆرۆپا بهێنە كرن ژ سیستەمێ كۆمان و دێ هەلویستێ هەر هەشت یانەیێن ئێكێ یێن دەربازبووی بۆ قۆناغا 16ێ دیاربن.
ریال مەدرید ژ سۆپرایزا برێست دترسیت.
یانەیا ریال مەدرید یا ئسپانی خودانا 15 ناسناڤێن چامپیۆنزێ و هەلگرا ناسناڤا وەرزێ بۆری د دیدارەكا چارەنڤیس دایە بەرانبەر یانەیا برێست یا فرەنسی ئەوا دێ ل یاریگەها فرانسیس جنیێ ل برێست هێتە كرن، یانەیا ئسپانی ل رێزا 16 دهێت ب كۆمكرنا 12 خالان، ژلایێ خوەڤە یانەیا فرەنسی رێزا 13 دهێت ب كۆمكرنا 13 خالان، هەرچەندە دیدارا ئێكێ یە د دیرۆكا هەردو یانەیان دا لێ یانەیا برێست شیایە ئەنجامێن باش بینت لێ یارییا ئەڤ شەڤە جودایە بەرانبەر یانەیەكا خودان ناسناڤ و دەنگییا خوە هەی، ژبلی ڤێنێسیۆس جونیرۆ هەموو یاریزانێن ریالێ د بەرهەڤن ئەوا دێ ژلایێ دادڤانێ نەرویجی ئسپن ئیسكاس هێتە بڕێڤەبرن.
بەرشەلۆنا بێ گڤاشتن دێ بەرانبەر ئەتلانتا بیت
یانەیا بەرشەلۆنا یا ئسپانی دێ ل وەلاتێ ئیتالیا بیتە مێڤانا یانەیا ئەتلانتا یا ئیتالی د یارییەكا گرن كدا بۆ یانەیا ئیتالی، ژبەركو بەرشەلۆنا دەربازبوونا خوە بۆ قۆناغا 16ێ مسۆگەر كرییە ب كۆمكرنا 18 خالان و رێزا دویێ دهێت، لێ یانەیا ئەتلانتا پێدڤییە خوسارەت نەبیت هەتا پلێتا دەربازبوونا ئێكسەر وەربگریت ئەوا ب14 خالان رێزا حەفتێ دهێت و نەكەڤیتە د دیدارێن پاشكۆیێ دا.
لیڤەرپۆل سەڕێ لیستێ بەرنادەت
یانەیا لیڤەرپۆل یا ئنگلتەرایێ خودانا سەرێ لیستێ و دەربازبوویا مسۆگەر بۆ قۆناغا 16ێ دێ ژدەرڤەیی یاریگەها خوە بیتە مێڤانا یانەیا ئیندهۆڤن یا هۆلەندی و بزاڤێن وێ پاقژكرنا بادەكا خوە یا سەركەفتنان و دەربازبوون وەكو قارەمانا قۆناغا ئێكێ، لێ یانەیا هۆلەندی یا ب سانەهی نابیت ئەوا دێ شەڕەكێ دژوار كەت هەتا مانا خوە ل زوونا پاشكۆ بۆ قۆناغا 16ێ مسۆگەر بكەت ژبەركو رێزا 19ێ دهێت ب 11 خالان و پێدڤییە خوسارەت نەبیت هەتا بگەهیتە ئارمانجا خوە، لێ بەرۆڤاژی هەر ئەنجامەكێ دی دوور نینە بهێتە دوورئێخستن.
دەلیڤەیا دووماهیێ بۆ بایرنێ بەردەستە
ژلایێ خوە یانەیا بایرن میونخ یا ئەلمانی د دەلیڤەیا دووماهیێ دا یە بۆ گەشكرنا هیڤیێن دەربازبوونێ دەمێ ل یاریگەها خوە مێڤاندارییا یانەیا سلۆڤان براتیسلافا یا سلۆڤینیا، ل دووڤ رێزبەندییا گشتی یانەیا ئەلمانی رێزا 15ێ دهێت ب كۆمكرنا 12 خالان لێ یانەیا سلۆڤینیا رێزا 35 و بەری دووماهیێ دهێت بێ هیچ خالەك، سەرباری كۆمەكا یاریزانێن بایرنێ یاریێ ناكەن ژبەر هنگاڤتن و كارتێن زەر، ژ وانا دانیێل پێرێتز، ئەلفۆنسۆ داڤیس، لیۆن گۆرتێز، لێ پێشبینی بۆ سەركەفتنا یانەیا باڤاریا دچن.
شەڕێ ئیتالی و پۆرتۆگالی بۆ ڕێكخوەشكرنا دەربازبوونی
پشت گەرمی ب جەماوەر و یاریگەها خوە ئەلیانز یانەیا یۆڤانتۆس یا ئیتالی دێ د دیدارەكا ئاگرین دا مێڤاندارییا یانەیا بەنفیكا یا پۆرتۆگالی كەت و هەردو یانە پێدڤی ب سەركەفتنێ نە ژبۆ رێكخوەشكرنا دەربازبوونێ بەر ب قۆناغا16ێ ئەوێن هەردو یانە د بازنەیا دیدارێن پاشكۆیێ نە، یۆڤانتۆس ب 12خالان رێزا 17ێ دهێت كێمترییا دو خالان بتنێ یانەیا بەنفیكا رێزا 21ێ دهێت، دیدارێن پێشتر یانەیا پۆرتۆگالی شیابوو شەش سەركەفتنان بینت و یۆڤانتۆس سێیان و سێ وەكهەڤ هەنە، هەردو یانەیان هیڤیێن دەربازبوونا ئێكسەر و پاشگۆ هەیە و ل دووڤ ئەنجامێن یاریێن دی.
شتۆتگارت و پاریس دناڤبەرا قورتالكرنێ و پاشكۆیێ دا
ل وەلاتێ ئەلمانییا یانەیا شتۆتگارد دێ ل یاریگەها خوە مێڤاندارییا یانەیا پاریس سانجێرمان یا فرەنسی كەت و پێشبینی د ڤەكرینە دناڤبەرا خوە قورتالكرنێ ژ دەستدانا هیڤیێن دەربازبوونێ و مان دناڤ پاشكۆیێ دا یان ژی سەركەفتن دگەل هەبوونا سۆپرایزا ئەنجامێن یانەیێن دی ب دەستڤە ئینانا پلێتەكا پاشكۆ، هەردو یانە خودان 10 خالن لێ پاریس رێزا22ێ یە و شتۆتگارد ل 24ێ یە كو دووماهی بازنەیا دەربازبوونێ بۆ پاشكۆیێ.
مان ستی و كلۆپ شەڕێ مان و نەمانێ
ئێك ژ یاریێن دی یێن گرنگ و ڤەبڕ یاریگەها ئیتحاد دێ خودانێن ئەردی مانچستەر ستی یا ئنگلتەرایێ و كلۆپ برۆچ یا بەلجیكی مێڤان كەت كو دبیتە یارییەكا چارەنڤیس بۆ هەردو یانەییان پێخەمەت بەردەوامی دان ب هەڤڕكییان دناڤ خولێ دا، مان ستی یا د زوونا داكەفتنێ دا و نە دەربازبوونێ خوە ب ڕێیا پاشكۆیێ ئەوا هەشت خال كۆمكرین رێزا 25 دهێت، بەرانبەر دا یانەیا بەلجیكی 10 خال كۆمكرینە ل رێزا 21 دهێت كو دبیتە زوونا پاشكۆ لێ هەكە خوە وەكهەڤی ژی ئینا دوور نینە ڤێ زوونێ ژی ژ دەست بدەت.
هەر ژ یاریێن دی یێن گرنگ د دیدارێن ئاگرین یێن ئەڤ شەڤە
ئینتەر میلان، ئیتالیا – مۆناكۆ، فرەنسا
شتۆرم گرانتس، نەمسا – لایپزیك، فرەنسا
برۆسیا دۆرتمۆند، ئەلمانیا – شاختار دۆنێتسك، ئۆكرانیا
بایرن لیڤەركۆزن، ئەلمانیا – سپارتا براگا، چیك
رێدبۆل سالزبۆرگ، نەمسا – ئەتلەتیكۆ مەدرید، ئسپانیا
جێرونا، ئیسپانیا – ئارسنال، ئنگلتەرا
دینامۆزاگرب، كرواتیا – میلان، ئیتالیا
لیل، فرەنسا – فاینۆرد رۆتردام، هۆلەندا
سپۆرتینگ لەشبۆنە، پۆرتۆگال – پۆلۆنیا، ئیتالیا
یۆنیگ بۆیز، سویسرا – سرفینا زڤیردا، سربیا
ئەستۆن فیلا، ئنگلتەرا – سێلتیك، ئسكۆتلەندا
لیستەیا گشتی بەری ب دووماهی هاتنا هەڤڕكیێن قۆناغا ئێكێ
1- لیڤەرپۆل 21 خال.
2- بەرشەلۆنا 18 خال.
3- ئارسنال 16 خال.
4- ئینتەر میلان 16 خال.
5- ئەتلەتیكۆ مەدرید 15 خال.
6- ئەی سی میلان 15 خال.
7- ئەتلانتا 14 خال.
8- لیڤەركۆزن 13 خال.
9- ئاستۆن ڤێلا 13 خال.
10- مۆناكۆ 13 خال.
11- فاینۆرد 13 خال.
12- لیل 13 خال.
13- برێست 13 خال.
14- دۆرتمۆند 12 خال.
15- بایرن میۆنخ 12 خال.
16- ریال مەدرید 12 خال.
17- یۆڤانتۆس 12 خال.
18- سێلتیك 12 خال.
19- ئایندهۆڤن 11 خال.
20- كلۆپ برۆچ 11 خال.
21- بەنفیكا 10 خال.
22- سانجێرمان 10 خال.
23- سپۆرتیك لەشبۆنە 10 خال.
24- شتۆتگارد 10 خال.
25- مانچستەر ستی هەشت خال.
26- دینامۆزاكراب هەشت خال.
27- شاختار دونێتسك حەفت خال.
28- بۆلۆنیا پێنج خال.
29- سپارتا براگا چار خال.
30- لایپزبك سێ خال.
31- جیرۆنا سێ خال.
32- سیرڤینیا زڤیزدا سێ خال.
33- ستۆرم گراتس سێ خال.
34- رێدبۆل سێ خال.
35- سلۆڤان براتیسلافا چو خال نینن.
36- یۆنگ بۆیز چو خال نینن.
شێوازێ یارییان و دەربازبوونێ
هەر 36 یانەیێن پشكدار ل سەر چار ئاستێن جودا و دووڤ پلەكرنا وەرزێ بۆری هاتبوونە بەلاڤكرن ئەوا پۆلینكرن ژلایێ فیدراسیۆنا فوتبۆلا ئۆرۆپا هاتیە دانان، یاریێن وان ب شێوەیێ خول ئێك قۆناغ د هاتنە كرن، هەر تیمەكێ هەشت یاری ئەنجامداینە، چار یاری د ناڤ ئەردێ خوە دا و چار ژ دەرڤەیی یاریگەها خوە، شێوازێ دەربازبوونێ بۆ قۆناغا 16 پشتی ب دووماهی هاتنا قۆناغا ئێكێ دێ ل دووڤ دووماهییا رێزبەندییا هەر36 تیما هێتە دیار كرن، ئەو تیمێن ل رێزا ئێكێ هەتا هەشتێ ئێكسەر دێ دەربازبنە قۆناغا 16ێ، ئەو یانەیێن رێزا نەهێ هەتا 24ێ دێ یاریێن خوە ب شێوەیێ دو گەڕ ئەنجامدەن ژبۆ دەربازبوونا هەشت تیمێن دی بۆ قۆناغا 16ێ، لێ ئەو یانەیێن ل رێزا 25 هەتا 36ێ هاتین ئەو دێ خاترا خوە ژ قارەمانیێ خوازن و هێنە دووركرن.
دیاركرنا ژڤانێ یاریێن قۆناغا 16ێ و دووماهیێ
بۆ زانین د قۆناغا 16ێ دا دێ شێوازێ هاتنۆچوون دناڤبەرا یانەیان هێتە كرن هەتا دگەهیتە یارییا دووماهیێ، بڕیارە یاریێن ئێكێ ل 17ێ هەتا 19ێ ئەیلۆنا بهێت دەستپێكەت، یاریێن دویێ ل ئێك و دو یا چرییا ئێكێ هێنە كرن، ل 22و 23ێ هەمان مەهـ یاریێن گەڕا سێیێ نە، دێ بەردەوامبن هەتا یارییا دووماهیێ ل 31ێ ئەیارا سالا 2025ێ ل یاریگەها ئالیانز ئارینا یا بایرن میۆنخ وەلاتێ ئەلمانییا هێتە كرن.
